‘देवाच्या दरबारात आणि गणरायाच्या पुढे कोणीही मोठा किंवा छोटा नसतो, त्याच्या दृष्टीने सर्व सामान्य नागरिक समान असतात,’ असे प्रतिपादन आमदार अमोल खताळ यांनी केले.
संगमनेर शहरातील ऐतिहासिक परंपरा लाभलेल्या मानाच्या सोमेश्वर तरुण मित्र मंडळाच्या गणेशाची विसर्जन मिरवणूक शुक्रवारी सकाळी साडेआठ वाजता मोठ्या उत्साहात सुरू झाली. त्यावेळी आयोजित महाआरतीप्रसंगी ते बोलत होते.
रंगारगल्ली येथील सोमेश्वर मित्र मंडळाच्या गणरायाची महाआरती आमदार अमोल खताळ आणि त्यांच्या पत्नी नीलम खताळ यांच्या हस्ते पार पडली. त्यानंतर पारंपरिक वाद्यांच्या गजरात विसर्जन मिरवणुकीला प्रारंभ झाला. १३१ वर्षांची प्रदीर्घ परंपरा जपणाऱ्या या मंडळाच्या आरतीप्रसंगी प्रांताधिकारी अरुण उंडे, पोलीस उपअधीक्षक डॉ. कुणाल सोनवणे, तहसीलदार धीरज मांजरे, नगरपालिकेचे मुख्याधिकारी दयानंद गोरे, पोलीस निरीक्षक समीर बारवकर यांच्यासह मंडळाचे पदाधिकारी आणि गणेशभक्त उपस्थित होते.
यावेळी बोलताना आमदार खताळ यांनी सध्याच्या दुष्काळी परिस्थितीवर चिंता व्यक्त केली. खरीप हंगामातील पिके वाया गेल्याने शेतकरी अडचणीत आला असला, तरी महायुती सरकार खंबीरपणे बळीराजाच्या पाठीशी उभे असल्याची ग्वाही त्यांनी दिली.
१९७२ चा दुष्काळ, मागील वर्षीचा ओला दुष्काळ आणि यंदाचा कोरडा दुष्काळ अशा संकटांमधून जनता मार्ग काढत असून, अल निनोचे संकट दूर होऊन राज्यात भरपूर पाऊस पडावा आणि सर्व नागरिक सुखी-समाधानी व्हावेत, असे साकडे त्यांनी विघ्नहर्त्याच्या चरणी घातले. तसेच राजकीय, सामाजिक व शैक्षणिक क्षेत्रात मिळालेल्या संधीचे सोने प्रत्येकाने केले पाहिजे, असे सांगत त्यांनी देव, देश आणि धर्मासाठी नेहमी तत्पर राहण्याचा पुनरुच्चार केला. उत्सव काळात गणेशभक्तांनी दिलेल्या प्रेमाबद्दल त्यांनी सर्वांचे आभार मानले. याप्रसंगी सोमेश्वर मंडळाच्या वतीने खताळ दांपत्याचा इच्छापूर्ती गणेशाची प्रतिमा देऊन भव्य नागरी सत्कार करण्यात आला.
आमदार दांपत्याने फिरवली लाठीकाठी- विसर्जन मिरवणुकीदरम्यान दांडपट्टा, लाठीकाठी आणि चक्री फिरवण्यासारख्या पारंपरिक मर्दानी खेळांची चित्तथरारक प्रात्यक्षिके सादर करण्यात आली. ही प्रात्यक्षिके पाहत असताना आमदार अमोल खताळ आणि त्यांच्या पत्नी नीलम खताळ यांनाही या पारंपरिक खेळाचा मोह आवरला नाही. दोघांनीही उत्स्फूर्तपणे हातात काठी घेऊन ती गरगर फिरवत खेळाचा आनंद लुटला.
