ढोल-ताशांच्या गजरात आमदार अमोल खताळांनी वाढवला गणेशभक्तांचा उत्साह; सलग तिसऱ्या वर्षी संगमनेरात स्वागत कक्ष

महाराष्ट्र संवाद न्यूज ऑनलाईन-

अनंत चतुर्दशीच्या पावन पर्वावर संगमनेर शहरात निघालेल्या गणेश विसर्जन मिरवणुकीत यंदा भक्ती, जल्लोष आणि अनोख्या उत्साहाचा संगम पाहायला मिळाला. ‘गणपती बाप्पा मोरया, पुढच्या वर्षी लवकर या’च्या जयघोषात संगमनेरकरांनी लाडक्या बाप्पाला भावपूर्ण निरोप दिला. या मिरवणुकीचे मुख्य आकर्षण ठरले ते आमदार अमोल खताळ यांनी स्वतः ढोल वाजवत गणेशभक्तांमध्ये भरलेला उत्साह!

गणेशोत्सवातून सामाजिक एकोपा, बंधुभाव आणि सांस्कृतिक परंपरा जपली जावी, या उद्देशाने आमदार अमोल खताळ यांच्या पुढाकारातून सलग तिसऱ्या वर्षी विसर्जन मिरवणुकीतील मंडळांसाठी भव्य स्वागत कक्षाची उभारणी करण्यात आली होती. मिरवणुकीत सहभागी झालेल्या प्रत्येक लहान-मोठ्या गणेश मंडळाचे आमदार खताळ यांनी वैयक्तिकरीत्या स्वागत करून त्यांच्या पदाधिकाऱ्यांना व कार्यकर्त्यांना सन्मानचिन्ह देऊन गौरवले. वर्षभर सामाजिक व धार्मिक कार्य करणाऱ्या कार्यकर्त्यांच्या पाठीवर ही कौतुकाची थाप ठरली.

स्वागत कक्षाजवळ मिरवणूक आल्यानंतर आमदार अमोल खताळ यांनी स्वतः हातात काठी धरून ढोलवादनात सहभाग घेतला. त्यांच्या ढोलवादनामुळे उपस्थित तरुण व गणेशभक्तांमध्ये प्रचंड चैतन्य निर्माण झाले आणि संपूर्ण परिसर ढोल-ताशांच्या गजरत दुमदुमून गेला. गणेश मंडळांच्या या सन्मानाची आणि स्वागताची सुंदर परंपरा पुढील काळातही अशीच अखंडपणे सुरू ठेवण्याचा संकल्प आमदार अमोल खताळ यांनी यावेळी व्यक्त केला.