संगमनेरचा दुष्काळग्रस्त तालुक्यांत समावेश; आमदार अमोल खताळ यांच्या पाठपुराव्याला यश

महाराष्ट्र संवाद न्यूज ऑनलाईन-
चालू वर्षी पावसात पडलेल्या मोठ्या खंडामुळे संगमनेर तालुक्यातील खरीप हंगाम पूर्णपणे वाया गेला असून शेतकरी गंभीर आर्थिक संकटात सापडला आहे. या बिकट परिस्थितीची दखल घेत आमदार अमोल खताळ यांनी मुंबईत मुख्यमंत्री देवेंद्र फडणवीस, उपमुख्यमंत्री एकनाथ शिंदे, कृषिमंत्री आणि पालकमंत्री राधाकृष्ण विखे पाटील यांची भेट घेऊन तालुक्यातील शेतकऱ्यांच्या व्यथा मांडल्या होत्या. त्यांच्या या सततच्या पाठपुराव्याला यश आले असून, राज्य शासनाने जाहीर केलेल्या २६५ दुष्काळग्रस्त तालुक्यांच्या यादीत संगमनेरचाही समावेश करण्यात आला आहे.
आमदार खताळ यांच्या कार्यालयाकडून देण्यात आलेल्या माहितीनुसार, पावसाअभावी खरीप पिके वाळून गेल्याने शेतकऱ्यांचे मोठे नुकसान झाले आहे. नुकतेच राज्याचे कृषिमंत्री दत्तात्रय भरणे यांनी पिंपळे येथे प्रत्यक्ष बांधावर जाऊन नुकसानीची पाहणी केली होती.
संगमनेरचा दुष्काळग्रस्त भागात समावेश झाल्यामुळे आता तालुक्यातील नुकसानग्रस्त पिकांचे पंचनामे केले जाणार असून, शेतकऱ्यांना दिलासा देण्यासाठी सरसकट पंचनामे करण्याची मागणी मुख्यमंत्र्यांकडे करण्यात आली आहे.
या निर्णयामुळे तालुक्यातील शेतकऱ्यांना जमीन महसुलात सूट, शेती कर्जाच्या वसुलीला स्थगिती किंवा कर्जाची पुनर्रचना, वीज बिलात सवलत, विद्यार्थ्यांच्या परीक्षा शुल्कात माफी आणि टँकरद्वारे पाणीपुरवठा यांसारख्या विविध सवलतींचा लाभ मिळणार आहे.
निसर्गाच्या लहरीपणामुळे शेतकरी संकटात असला तरी महायुती सरकार त्यांच्या पाठीशी ठामपणे उभे असल्याचे सांगत, आगामी काळातही शेतकऱ्यांच्या प्रश्नांसाठी कटिबद्ध राहण्याची ग्वाही आमदार खताळ यांनी दिली.