SIR च्या नोटिसा आल्यात, घाबरू नका; दक्ष रहा!नोटीस मिळालेल्या नागरिकांनी कागदपत्रांची पूर्तता करून कॅम्पला उपस्थित राहावे — काँग्रेस कार्याध्यक्ष अमोल शेलकर

महाराष्ट्र संवाद न्यूज ऑनलाईन-

SIR संदर्भातील नोटिसा काही नागरिकांना प्राप्त होत असून, या नोटिसांमुळे नागरिकांनी घाबरून जाण्याची गरज नाही. मात्र, दक्ष राहून आवश्यक कागदपत्रांची पूर्तता करणे आणि प्रशासनाकडून आयोजित करण्यात येणाऱ्या कॅम्पमध्ये आवर्जून उपस्थित राहणे गरजेचे आहे, असे आवाहन संगमनेर तालुका काँग्रेस कमिटीचे कार्याध्यक्ष अमोल शेलकर यांनी केले आहे.

SIR प्रक्रियेमध्ये सेल्फ मॅपिंग, प्रोजेनी मॅपिंग किंवा नो मॅपिंग अशा प्रकारच्या नोंदी असलेल्या नागरिकांना नोटिसा येण्याची शक्यता आहे. त्यामुळे नोटीस प्राप्त झालेल्या नागरिकांनी तातडीने आपल्या संबंधित BLO शी संपर्क साधावा, असे शेलकर यांनी सांगितले.

नोटीस मिळालेल्या नागरिकांनी आगामी कॅम्पच्या वेळी आवश्यक कागदपत्रे सादर करण्यासाठी तयारी ठेवावी. स्वतःच्या जन्मतारखेचा पुरावा म्हणून जन्म दाखला, दहावी किंवा बारावीचे प्रमाणपत्र, पासपोर्ट किंवा बँक पासबुक यापैकी उपलब्ध असलेला संबंधित पुरावा तसेच आई किंवा वडिलांपैकी संबंधित पालकाचा उपलब्ध पुरावा सोबत ठेवावा. त्याचबरोबर 2002 च्या मतदार यादीतील ओळख/मतदार नोंद उपलब्ध असल्यास तीही सादर करावी, असे आवाहन करण्यात आले आहे.

“नोटीस आली म्हणजे मतदानाचा अधिकार संपला असा अर्थ नाही. मात्र नोटीसकडे दुर्लक्ष करणेही योग्य नाही. आवश्यक कागदपत्रे तयार ठेवून BLO शी संपर्क साधा आणि कॅम्पच्या दिवशी स्वतः उपस्थित राहा,” असे अमोल शेलकर यांनी स्पष्ट केले.

जनजागृतीची गरज-

SIR प्रक्रियेबाबत नागरिकांमध्ये विविध प्रकारचे गैरसमज आणि संभ्रम निर्माण होऊ शकतात. त्यामुळे प्रत्येक जागरूक नागरिकाने आपल्या वार्डात, गावात, गल्लीत तसेच नातेवाईक आणि मित्रपरिवारामध्ये या प्रक्रियेची योग्य माहिती पोहोचवावी, असे आवाहनही शेलकर यांनी केले.

नागरिकांनी सोशल मीडियावरील अपूर्ण किंवा अफवांवर विश्वास न ठेवता अधिकृत माहिती घ्यावी, आपल्या BLO शी संपर्क साधावा आणि आवश्यक प्रक्रिया वेळेत पूर्ण करावी, असेही त्यांनी सांगितले.

“घाबरू नका, पण गाफीलही राहू नका; SIR ची प्रक्रिया समजून घ्या, कागदपत्रे तयार ठेवा आणि आपला मतदानाचा हक्क सुरक्षित ठेवण्यासाठी जागरूक नागरिक म्हणून पुढे या,” असे आवाहन संगमनेर तालुका काँग्रेस कमिटीचे कार्याध्यक्ष अमोल शेलकर यांनी केले.