शेतात टोमॅटो तोडण्याच्या किरकोळ कारणावरून झालेल्या वादाचे रूपांतर गंभीर हाणामारी, विनयभंग आणि दंगलीत झाल्याची घटना संगमनेर तालुक्यातील खंडेरायवाडी (पिंपळगाव देवा) येथे घडली आहे. गुरुवारी (२४ सप्टेंबर) घडलेल्या या घटनेप्रकरणी घारगाव पोलीस ठाण्यात १२ जणांविरुद्ध भारतीय न्याय संहिता, पोक्सो (POCSO), ॲट्रॉसिटी आणि शस्त्र कायद्यांतर्गत गुन्हा दाखल करण्यात आला आहे.
मिळालेल्या माहितीनुसार, गुरुवारी सकाळी शेतात काम करत असताना आरोपी कानिफनाथ वाळूंज याने महिलांना अश्लील भाषेत शिवीगाळ केली. या प्रकाराबाबत विचारणा करण्यासाठी गेलेल्या तक्रारदार महिलेचा विनयभंग करण्यात आला तसेच तिच्या १४ वर्षांच्या अल्पवयीन मुलीचा हात धरून तिला अश्लील भाषेचा वापर करत धमकी देण्यात आली. आरोपींनी तक्रारदार महिलेच्या गळ्यातील सुमारे ३५,००० रुपये किमतीचे सोन्याचे मंगळसूत्र जबरदस्तीने ओढून नेले.
यानंतर हा वाद मिटवण्यासाठी गेलेल्या नातेवाईकांना आरोपींनी आणि त्यांच्या साथीदारांनी मारुती मंदिराच्या आत डांबून ठेवले. तलवार, हॉकीस्टिक, लोखंडी गज आणि दगडांनी बेदम मारहाण करून काहींना गंभीर जखमी केले. पीडितांच्या खिशातील रोख रक्कम जबरदस्तीने काढून घेण्यात आली आणि त्यांच्या दुचाकींचेही मोठे नुकसान करण्यात आले.
या प्रकरणी उषा शरद पवार (वय ३५, रा. अंभोरे) यांच्या फिर्यादीवरून घारगाव पोलीस ठाण्यात गुन्हा नोंदवण्यात आला आहे. पोलिसांनी धनंजय वाळूंज, प्रतिक वाळूंज, अभिषेक वाळूंज, शैलेश बोऱ्हाडे, विदेश ढेरेगे, भानुदास वाळूंज, बाळू उंडे, संजय ढेरंगे, निलेश ढेरंगे, जिवन वाळूंज, गणेश ढेरंगे आणि सतीश वाळूंज यांच्याविरुद्ध विविध कलमांनुसार गुन्हा दाखल केला आहे. पोलीस उपअधीक्षक कुणाल सोनवणे यांच्या मार्गदर्शनाखाली या घटनेचा पुढील तपास सुरू आहे.
