सहकाराची परंपरा जपण्यासाठी अहिल्यानगर जिल्हा बँक निवडणूक बिनविरोध करण्यासाठी सर्वपक्षीय नेत्यांचे एकमत, संगमनेरात पार पडली बैठक; या नेत्यांची होती उपस्थिती

महाराष्ट्र संवाद न्यूज ऑनलाईन-

अहिल्यानगर जिल्हा मध्यवर्ती सहकारी बँकेची आगामी पंचवार्षिक निवडणूक बिनविरोध पार पाडण्यासाठी जिल्ह्यातील सर्व राजकीय पक्षांचे प्रमुख नेते, लोकप्रतिनिधी आणि सहकार क्षेत्रातील दिग्गजांनी सकारात्मक पाऊल उचलले आहे. संगमनेर येथे सहकार महर्षी भाऊसाहेब थोरात साखर कारखाना येथे रविवारी पार पडलेल्या महत्त्वपूर्ण बैठकीत राजकीय मतभेद बाजूला ठेवून जिल्ह्याच्या आणि शेतकऱ्यांच्या व्यापक हितासाठी निवडणूक टाळण्यावर सर्वपक्षीय नेत्यांचे एकमत झाले.

जिल्ह्यात निर्माण झालेली दुष्काळी परिस्थिती, शेतकरी आणि सहकार क्षेत्रापुढील गंभीर आव्हाने लक्षात घेता अनावश्यक राजकीय स्पर्धा टाळण्याची गरज बैठकीत व्यक्त करण्यात आली. अहिल्यानगर जिल्हा बँकेने नेहमीच सहकाराची राजकारणविरहित वाटचाल जपली आहे. हीच परंपरा पुढे नेत ग्रामीण अर्थव्यवस्थेचा मुख्य आधार असलेल्या बँकेचे कामकाज अधिक सक्षम आणि पारदर्शक ठेवण्यासाठी सर्वांनी एकत्र येण्याचे आवाहन करण्यात आले.

या बैठकीस माजी महसूलमंत्री बाळासाहेब थोरात, माजी मंत्री शंकरराव गडाख, माजी खासदार डॉ. सुजय विखे पाटील, माजी आमदार डॉ. सुधीर तांबे, आमदार आशुतोष काळे, आमदार संग्राम जगताप, आमदार हेमंत ओगले, आमदार विवेक कोल्हे, आमदार विक्रम पाचपुते, आमदार प्राजक्त तनपुरे, आमदार काशिनाथ दाते, आमदार अक्षय कर्डिले, श्रीरामपूरचे नगराध्यक्ष करण ससाने, श्रीगोंदा साखर कारखान्याचे चेअरमन राजेंद्र नागवडे, तसेच ज्येष्ठ नेते भगवानराव पाचपुते व प्रतापसिंह पाचपुते प्रत्यक्ष उपस्थित होते.

याशिवाय आमदार मोनिका राजळे आणि बँकेचे माजी अध्यक्ष चंद्रशेखर घुले यांनी ऑनलाइन माध्यमातून सहभागी होऊन या निर्णयाला पूर्ण पाठिंबा दिला. व्यस्त कार्यक्रमांमुळे जे नेते उपस्थित राहू शकले नाहीत, त्यांच्याशी संवाद साधून सर्वांना या भूमिकेत सोबत घेतले जाईल, असे जिल्हा बँक निवडणूक समितीने स्पष्ट केले आहे.