मुलांऐवजी पालकांसाठी संस्कार शिबिर घ्या! — डॉ. संजय कळमकर यांचा घणाघाती टोला; बालकुमार साहित्य संमेलनात रंगली वैचारिक चर्चा

महाराष्ट्र संवाद न्यूज ऑनलाईन-

“सध्याच्या डिजिटल युगात अन्न, वस्त्र आणि निवारा यासोबत ‘मोबाईल डेटा’ ही चौथी मूलभूत गरज बनली आहे. मोबाईलच्या अतिवापरामुळे घरातील संवाद संपला असून गोष्टी सांगणे पूर्णपणे बंद झाले आहे. त्यामुळे आजच्या काळात विद्यार्थ्यांऐवजी पालकांसाठीच संस्कार शिबिर घेण्याची खरी गरज निर्माण झाली आहे,” असा घणाघाती टोला ज्येष्ठ साहित्यिक डॉ. संजय कळमकर यांनी लगावला. 

संगमनेर येथील मातोश्री लॉन्सवर आयोजित बालकुमार साहित्य संमेलनाच्या अध्यक्षीय भाषणात ते बोलत होते. व्यासपीठावर स्वागताध्यक्ष दुर्गाताई तांबे, उद्घाटक ज्येष्ठ पत्रकार व साहित्यिक डॉ. स्वाती महाळंक, कार्यवाह प्रसाद मिरासदार, श्रीमती सुवर्णाताई मालपाणी, डॉ. नितीन संगमनेरकर, प्रा. बाबा खरात, संगमनेर शाखेचे अध्यक्ष अनिल देशपांडे, अनिल सोमणी, अरविंद गाडेकर, दर्शन जोशी, ओंकारनाथ बिहानी, अरुण लेले, डॉ .विवेक वाकचौरे, प्रा शशांक गंधे, चारुदत्त काटकर, प्रा. प्रकाश पारखे, प्राचार्य एस. एम. खेमनर, उपप्राचार्य सुरेखा दिघे, यांच्यासह विविध पदाधिकारी उपस्थित होते.

संमेलनाध्यक्षपदावरून बोलताना डॉ. कळमकर म्हणाले की, संगमनेरला मोठी साहित्यिक परंपरा लाभली आहे. मानवाला लाभलेल्या ६४ कलांपैकी कोणतीतरी एक कला प्रत्येकामध्ये दडलेली असते; ती ओळखून विद्यार्थ्यांनी त्यात आपले करिअर घडवावे. मोबाईलच्या अतिवापरामुळे आळशीपणा, स्थूलता, दृष्टीदोष आणि अपुरी झोप यांसारख्या शारीरिक समस्या वाढत आहेत.

टीव्ही आणि मोबाईलमुळे आज आपली कुटुंब व्यवस्था अडचणीत आली आहे. जुन्या काळी गरिबी होती, फाटके कपडे शिवून आणि धुऊन वापरण्यात आनंद होता; पण आज श्रीमंती आल्यामुळे महागडे कपडे फाडले जातात, ही कुठली फॅशन असा सवाल करत त्यांनी खंत व्यक्त केली. जीवनाचा पाया समृद्ध करण्यासाठी विद्यार्थ्यांनी मोबाईल टाळून पुस्तकांशी मैत्री करावी आणि वाचनातून आनंद मिळवावा, असा सल्ला त्यांनी दिला.

या संमेलनाचे उद्घाटन ज्येष्ठ पत्रकार व साहित्यिक डॉ. स्वाती महाळंक यांच्या हस्ते दीपप्रज्वलनाने करण्यात आले. आपल्या उद्घाटनाच्या भाषणात डॉ. महाळंक म्हणाल्या की, शंभरावे साहित्य संमेलन पुण्यात होत असून साहित्य संमेलनाची शंभरी साजरी होणे हा महाराष्ट्रासाठी अत्यंत आनंदाचा क्षण आहे. या निमित्ताने राज्यभरात ९९ नांदी साहित्य संमेलने घेतली जात आहेत. विद्यार्थ्यांनी केवळ वाचू नये तर स्वतःची एक गोष्ट लिहिण्याचा प्रयत्न करावा, कारण वाचनाने आणि ऐकण्याने माणसाचे मन समृद्ध होते, असे आवाहन त्यांनी विद्यार्थ्यांना केले.

कार्यक्रमाचे प्रास्ताविक बालकुमार साहित्य शाखेचे संगमनेर अध्यक्ष अनिल देशपांडे यांनी केले, त्यांनी संमेलनाच्या आयोजनामागील भूमिका मांडली. तर डॉ. विवेक वाकचौरे यांनी उपस्थितांचे आभार मानले. विशेष म्हणजे, या संपूर्ण कार्यक्रमाचे सूत्रसंचालन इयत्ता नववीची विद्यार्थिनी कुमारी संस्कृती नरवडे हिने अत्यंत आत्मविश्वासाने केले.

दिवसभरात रंगलेल्या या संमेलनात ‘बोलक्या बाहुल्या’ हा मनोरंजनाचा कार्यक्रम, त्यागराज खाडिलकर व दीपिका जोग यांचा ‘अक्षर गाणी’ कार्यक्रम, भव्य पुस्तक प्रदर्शन, संगीतमय कविता गायन आणि माहितीपट अशा विविध भरगच्च उपक्रमांचे आयोजन करण्यात आले होते. या संमेलनाला संगमनेरमधील साहित्यिक, लेखक, कवी, विविध शाळांचे प्राचार्य, शिक्षक आणि २४ शाळांमधील शेकडो विद्यार्थी मोठ्या संख्येने उपस्थित होते.