चंदनापुरी येथे ‘वसुंधरा पायी दिंडी’चे स्वागत व वृक्षारोपण— बदलत्या हवामानावर मात करण्यासाठी प्रत्येकाने झाड लावून संवर्धन करावे: आमदार अमोल खताळ

महाराष्ट्र संवाद न्यूज ऑनलाईन-

बदलते हवामान, वाढते तापमान आणि राज्यात निर्माण झालेली दुष्काळी परिस्थिती यावर मात करण्यासाठी पर्यावरणाचे संतुलन राखणे ही काळाची गरज बनली आहे. त्यासाठी केवळ शासनच नव्हे, तर प्रत्येक नागरिकाने किमान एक झाड लावून त्याचे जोपासना व संवर्धन करण्याची जबाबदारी स्वीकारायला हवी, असे प्रतिपादन आमदार अमोल खताळ यांनी केले.

जगद्गुरू श्रीमद् रामानंदाचार्य नरेंद्राचार्यजी महाराज (नाणीजधाम) यांच्या नाशिक रामशेज उपपीठातून निघालेल्या ‘वसुंधरा पायी दिंडी सोहळ्याचे संगमनेर-सिन्नर सरहद्दीवरील कर्हे घाट येथे अहिल्यानगर जिल्हा भक्त मंडळाच्या वतीने स्वागत करण्यात आले.

घुलेवाडी येथील मुक्कामानंतर ही दिंडी आळेफाट्याकडे मार्गस्थ होत असताना चंदनापुरी येथील सिद्धू लॉन्स येथे दर्शन व महाप्रसादासाठी थांबली होती. याप्रसंगी आमदार अमोल खताळ पाटील यांनी स्वामी नरेंद्राचार्य महाराजांचे दर्शन घेऊन आशीर्वाद घेतले. त्यानंतर त्यांच्या हस्ते परिसरात वृक्षारोपण करण्यात आले.

वसुंधरा पायी दिंडीच्या माध्यमातून गावागावात पर्यावरण संवर्धनाचा अत्यंत स्तुत्य संदेश पोहोचवला जात असून, यामुळे नागरिकांमध्ये वृक्षलागवडीबाबत मोठी जनजागृती होत असल्याचे मत यावेळी आमदार खताळ यांनी व्यक्त केले.

कार्यक्रमादरम्यान भक्त मंडळाच्या वतीने आमदार खताळ यांचा विशेष सन्मान करण्यात आला. या सोहळ्यास स्वामी नरेंद्राचार्य महाराज भक्त मंडळाचे पदाधिकारी, महायुतीचे नेते, कार्यकर्ते आणि भाविक मोठ्या संख्येने उपस्थित होते.