संगमनेरमध्ये पालकमंत्री विखे पाटलांचा अधिकाऱ्यांना इशारा: दुष्काळात कामात हलगर्जीपणा चालणार नाही; पशुसंवर्धन विभागाला नोटीस

महाराष्ट्र संवाद न्यूज ऑनलाईन-

सध्याच्या टंचाईच्या परिस्थितीत सर्वच विभागाच्या अधिकाऱ्यांनी थेट गावागावात जाऊन दुष्काळ निवारणाच्या उपाययोजनांबाबत तत्परतेने कार्यवाही करावी, असा स्पष्ट आदेश देत कामात हलगर्जीपणा करणाऱ्यांवर कठोर कारवाई करण्यास भाग पाडू नका, असा कडक इशारा पालकमंत्री राधाकृष्ण विखे पाटील यांनी दिला. 

रविवारी संगमनेर येथे आयोजित टंचाई आढावा बैठकीत ते बोलत होते. यावेळी आमदार अमोल खताळ पाटील, अतिरिक्त जिल्हाधिकारी शैलेंद्र हिंगे, उपमुख्य कार्यकारी अधिकारी विजय मुळीक, जिल्हा अधीक्षक कृषी अधिकारी सुधाकर बोराळे, प्रांताधिकारी अरुण उंडे, तहसीलदार धीरज मांजरे आणि गटविकास अधिकारी प्रवीण सिनारे यांच्यासह विविध विभागांचे प्रमुख अधिकारी उपस्थित होते.

बैठकीत पशुसंवर्धन विभागाच्या भोंगळ कारभारावर पालकमंत्र्यांनी अत्यंत तीव्र शब्दांत नाराजी व्यक्त केली. झिरो पशुवैद्यकीय अधिकारी नेमून कारभार चालवणे, लसीकरणासाठी जादा पैसे उकळणे आणि चारा उत्पादनासाठी बियाणे वाटप केलेल्या शेतकऱ्यांची अचूक माहिती न देण्यासारख्या गंभीर बाबी समोर आल्याने अतिरिक्त जिल्हाधिकारी शैलेंद्र हिंगे यांना पशुसंवर्धन विभागाच्या संबंधित अधिकाऱ्यांना तात्काळ ‘कारणे दाखवा’ नोटीस बजावण्याचे आदेश देण्यात आले.

आगामी सहा महिन्यांचा चारा उत्पादनाचा ठोस आराखडा तयार करण्याचे निर्देश देत महावितरण कंपनीने गरजेच्या ठिकाणी तात्काळ रोहित्र बदलून पुढील एका महिन्यात विजेचे सर्व प्रश्न निकाली काढावेत, अशी सक्त सूचना त्यांनी केली.

जलजीवन मिशन अंतर्गत सुरू असलेल्या पाणीपुरवठा योजनांच्या कागदपत्रांतील आणि प्रत्यक्ष बैठकीत मांडल्या जाणाऱ्या माहितीतील तफावतीवर पालकमंत्र्यांनी बोट ठेवले. या योजनांच्या पूर्णतेसाठी आवश्यक निधीचा त्वरित अहवाल सादर करण्याचे निर्देश त्यांनी दिले. तसेच प्रवरा नदीपात्रात सोडल्या जाणाऱ्या दूषित पाण्याबाबत ग्रामस्थांच्या आलेल्या तक्रारींची दखल घेण्यात आली.

याच वेळी साकूर परिसरासाठी २२५ कोटी रुपयांच्या उपसा सिंचन योजनेला लवकरच प्रशासकीय मान्यता मिळणार असून भोजापूर कालवा पूरचारीसाठी ४४ कोटी रुपये मंजूर झाल्याचे आणि नदीजोड प्रकल्पात समावेश झाल्याने निधीची अडचण भासणार नसल्याची माहिती त्यांनी दिली.

नैसर्गिक आपत्तीमुळे संकटात सापडलेल्या शेतकऱ्यांच्या पाठीशी शासन खंबीरपणे उभे असल्याचे सांगत, आमदार अमोल खताळ पाटील यांनी नुकसानग्रस्त पिकांचे पंचनामे करताना कोणताही शेतकरी मदतीपासून वंचित राहणार नाही याची दक्षता घेण्याचे आणि पंचनाम्यांच्या याद्या केवळ ग्रामपंचायतीच्या फलकावर न लावता सोशल मीडियाद्वारे गावकऱ्यांपर्यंत पोहोचवण्याचे निर्देश प्रशासनाला दिले.