महाराष्ट्र संवाद न्यूज ऑनलाईन- महायुती व महाविकास आघाडीने शिवसेनेला विश्वासात न घेता निवडणूक बिनविरोध करण्याचे प्रयत्न सुरू केले होते. मात्र, त्याला आव्हान देत शिवसेनेने जिल्ह्यातील सर्वच मतदारसंघांत उमेदवार उतरवण्याची भूमिका घेतली आहे. याच रणनीतीचा भाग म्हणून आमदार अमोल खताळ, आमदार विठ्ठलराव लंघे माजी खासदार सदाशिव लोखंडे यांच्या प्रमुख उपस्थितीत संगमनेर तालुक्यातील तीन उमेदवारांनी आपल्या अर्ज दाखल केले आहे.
अहिल्यानगर जिल्हा मध्यवर्ती सहकारी बँकेच्या निवडणुकीची रणधुमाळी चांगलीच तापली असून उपमुख्यमंत्री एकनाथ शिंदे यांच्या नेतृत्वाखालील शिवसेनेने स्वतंत्रपणे ताकद दाखवत सहकार क्षेत्रात प्रवेश करण्याचा निर्णय घेतला आहे.
उमेदवारी अर्ज दाखल करण्याच्या अखेरच्या दिवशी शिवसेना शिंदे गटाकडून शेती सहकारी संस्था मतदारसंघातून निमज येथील बादशाह दत्तू गुंजाळ, शेतीपूरक व प्रक्रिया संस्था मतदारसंघातून मंगळापूर येथील शंकर मारुती वाळे, तर अनुसूचित जाती-जमाती राखीव मतदारसंघातून पंढरीनाथ माधव इल्हे यांनी निवडणूक निर्णय अधिकाऱ्यांकडे उमेदवारी अर्ज सोपवले.
यावेळी शिवसेनेचे जिल्हाप्रमुख बाबूशेठ टायरवाले, कमलाकर कोते, रावसाहेब खेवरे यांच्यासह संगमनेर, अकोले आणि श्रीरामपूर तालुक्यातील पदाधिकारी व शिवसैनिक मोठ्या संख्येने उपस्थित होते.
शिवसेनेच्या या अचानक झालेल्या एन्ट्रीमुळे जिल्हा बँकेच्या निवडणुकीतील राजकीय समीकरणे बदलली असून ऐन निवडणुकीच्या तोंडावर रंगत आणि चुरस प्रचंड वाढली आहे.
