महाराष्ट्र संवाद न्यूज ऑनलाईन- अहिल्यानगर येथून नगर-मनमाड रस्त्याने भिवंडी येथे बेकायदेशीरपणे विक्रीसाठी नेण्यात येणारा सुगंधीत सुपारी, तंबाखू व गुटख्याचा साठा स्थानिक गुन्हे शाखा आणि अन्न व औषध प्रशासनाच्या संयुक्त पथकाने हस्तगत केला आहे. नांदगाव शिवारातील इसार पेट्रोलपंपासमोर करण्यात आलेल्या या धडक कारवाईत बोलेरो पिकअप वाहनासह तब्बल १२ लाख ८१ हजार १३५ रुपयांचा मुद्देमाल जप्त करण्यात आला असून दोन आरोपींना रंगेहात ताब्यात घेण्यात आले आहे. तर या प्रकरणातील मुख्य सूत्रधारांसह चार जण फरार झाले आहेत.
पोलीस अधीक्षक मुम्मका सुदर्शन यांनी जिल्ह्यातील अवैध धंद्यांवर कारवाई करण्याचे निर्देश स्थानिक गुन्हे शाखेला दिले आहेत. त्याअनुषंगाने स्थानिक गुन्हे शाखेचे पोलीस निरीक्षक संतोष मुटकुळे यांच्या मार्गदर्शनाखाली पोलीस अंमलदार विजय ठोंबरे, संतोष खैरे, अभिजीत अरकल, रणजीत जाधव व भगवान धुळे यांचे पथक एमआयडीसी पोलीस ठाण्याच्या हद्दीत गस्त घालत होते. त्यावेळी दोन इसम बोलेरो पिकअप (क्र. MH-04-MR-2329) मधून नगर-मनमाड रस्त्याने भिवंडीकडे बेकायदेशीर गुटखा घेऊन जात असल्याची गोपनीय माहिती पथकाला मिळाली.
स्थानिक गुन्हे शाखेच्या पथकाने तत्काळ अन्न व औषध प्रशासनाचे अन्न सुरक्षा अधिकारी प्रदीप परशुराम पवार यांना सोबत घेऊन नगर-मनमाड रस्त्यावरील नांदगाव (ता. अहिल्यानगर) येथील हॉटेल खालसा पंजाब शेजारी सापळा रचला. संशयित वाहन येताच पंचांसमक्ष अडवून पाहणी केली असता, त्यात मोठ्या प्रमाणात बंदी असलेला सुगंधीत पानमसाला, सुपारी आणि तंबाखूचा साठा आढळून आला.
या कारवाईत कैफ अहमद अल्ताफ शेख (वय ४५, रा. शांतीनगर, भिवंडी, जि. ठाणे) आणि वाजीद उर्फ गोल्डी शब्बीर शेख (वय २९, रा. बुऱ्हाणपूर, लोहारमंडी, लालबाग, मध्य प्रदेश) या दोघांना घटनास्थळावरून ताब्यात घेण्यात आले. त्यांच्या ताब्यातून ६ लाख ६०० रुपयांची सुगंधीत सुपारी, ९२ हजार ४०० रुपयांची टोबॅको, ६१ हजार ३६० रुपयांचा रजनीगंधा पानमसाला, २६ हजार ७७५ रुपयांची तुलसी सुगंधीत तंबाखू आणि ५ लाख रुपये किमतीची बोलेरो मॅक्स पिकअप गाडी असा एकूण १२,८१,१३५ रुपयांचा मुद्देमाल जप्त करण्यात आला.
अटक केलेल्या आरोपींकडे सखोल चौकशी केली असता, हा माल राजू कुरेशी उर्फ मोहम्मद मुस्लिम मोहंमद्दीर अन्सारी (रा. भिवंडी), इम्रान उर्फ मोहम्मद इकबाल कुरेशी (रा. गुलजारनगर, भिवंडी), भूपेंद्र बापू सिंह (रा. पोलो ग्राऊंड, इंदौर, मध्य प्रदेश) आणि अक्षय गुप्ता (रा. इंदौर, मध्य प्रदेश) यांच्या सांगण्यावरून खरेदी केल्याचे निष्पन्न झाले. फरार असलेल्या या चारही आरोपींचा पोलीस शोध घेत असून, याप्रकरणी एमआयडीसी पोलीस ठाण्यात गुन्हा दाखल करण्याची प्रक्रिया सुरू आहे.
