झाडपाल्याचे औषध देण्याच्या बहाण्याने अल्पवयीन मुलीस मिठी मारली, संगमनेरच्या जिल्हा व सत्र न्यायालयाने आरोपीला दिली शिक्षा; काय आहे प्रकार….

महाराष्ट्र संवाद न्यूज ऑनलाईन-
अल्पवयीन मुलीचा विनयभंग करून तिच्यावर अत्याचार करण्याचा प्रयत्न केल्याप्रकरणी संगमनेर येथील सत्र न्यायालयाने आरोपी रुपेश उर्फ अनिल बुधा सोनवणे (रा. मुरशेत, ता. अकोले) याला दोषी ठरवत ३ वर्षांच्या सक्तमजुरीची व दंडाची शिक्षा सुनावली आहे. तर या प्रकरणाती दुसरा आरोपी पंढरी प्रभाकर पगारे (रा. आधारवाडी, ता. इगतपुरी) यांची पुराव्याअभावी निर्दोष मुक्तता करण्यात आली आहे.
घटनेची पार्श्वभूमी अशी की, ६ ऑक्टोबर २०२३ रोजी संध्याकाळी आरोपी रुपेश सोनवणे याने पीडित मुलीला झाडपाल्याचे औषध देण्याच्या बहाण्याने मोटरसायकलवर बसवून शिंगणवाडी शिवारातील जंगलात नेले. तेथे तिच्यासोबत गैरकृत्य करण्याचा प्रयत्न करून तिचा विनयभंग केला. या घटनेनंतर पीडितेने राजूर पोलीस ठाण्यात दिलेल्या फिर्यादीवरून गुन्हा रजिस्टर नंबर ३४८/२०२३ नुसार भारतीय दंड संहिता कलम २१२, ३५४, ३६६ आणि बाल लैंगिक अत्याचार कायदयाअंतर्गत गुन्हा दाखल करण्यात आला होता.
या खटल्याची सुनावणी जिल्हा व सत्र न्यायाधीश मंदार नेरलेकर यांच्या न्यायालयात झाली. सरकार पक्षाच्या वतीने न्यायालयात सहा साक्षीदारांची तपासणी करण्यात आली. यातून महत्वपूर्ण माहिती न्यायालयासमोर आली. न्यायालयाने साक्षी-पुरावे आणि दोन्ही बाजूंचा युक्तिवाद ग्राह्य धरून आरोपी रुपेश उर्फ अनिल बुधा सोनवणे याला पोक्सो कायदा कलम ८ अंतर्गत ३ वर्षांचा सक्तमजुरीचा कारावास आणि २००० रुपये दंड सुनावला. दंड न भरल्यास १५ दिवसांच्या अतिरिक्त कारावासाची तरतूद करण्यात आली आहे. याशिवाय भारतीय दंड संहिता कलम ३५४ अंतर्गत २ वर्षे सक्तमजुरी व २००० रुपये दंड, तसेच कलम ३६६ अंतर्गत २ वर्षे सक्तमजुरी व १००० रुपये दंडाची शिक्षा सुनावण्यात आली. तसेच पीडितेला ५००० रुपयांची आर्थिक भरपाई देण्याचे आदेश देण्यात आले आहेत.
या प्रकरणात पोलीस तपासात तपासी अंमलदार म्हणून पी.एस.आय. फझल शेख यांनी काम पाहिले. तर सरकार पक्षातर्फे अतिरिक्त सरकारी वकील मच्छिंद्र गवते यांनी काम पाहिले. या खटल्यात पैरवी कॉन्स्टेबल म्हणून स्वाती नाईकवाडी यांनी सहकार्य केले.