सायखिंडी फाटा गांजा तस्करीत आरोपींना पुन्हा १२ ऑक्टोबरपर्यंत पोलीस कस्टडी; बँक खात्यांचे आर्थिक व्यवहार पोलिसांच्या रडारवर

महाराष्ट्र संवाद न्यूज ऑनलाईन-

शहरालगत सुमारे दीडशे किलो गांजा प्रकरणी करण्यात आलेल्या कारवाईत अटक करण्यात आलेल्या आरोपींच्या पोलीस कोठडीची मुदत संपत असल्याने त्यांना न्यायालयासमोर हजर करण्यात आले असता, संगमनेर न्यायालयाने आरोपींना १२ ऑक्टोबरपर्यंत पोलीस कोठडी सुनावली आहे. आरोपींच्या कोठडीत दुसऱ्यांदा वाढ करण्यात आली आहे.

नाशिक-पुणे राष्ट्रीय महामार्गावरील सायखिंडी फाटा येथे अहिल्यानगरच्या स्थानिक गुन्हे शाखेने केलेल्या कारवाईत ७६ लाख ३० हजार ५०० रुपये किमतीचा १५२.६१ किलो वाळलेला सुट्टा गांजा आणि वाहनासह तब्बल ८८ लाख १८ हजार १७० रुपयांचा मुद्देमाल जप्त करण्यात आला होता.

या प्रकरणी स्थानिक गुन्हे शाखेचे पोलीस कॉन्स्टेबल सुनील मालणकर यांच्या फिर्यादीवरून संगमनेर शहर पोलीस ठाण्यात गुंगीकारक औषधीद्रव्य आणि मनोव्यापारावर परिणाम करणारे अधिनियम (NDPS Act) च्या विविध कलमांनुसार गुन्हा दाखल करण्यात आला आहे. या गुन्ह्यात दत्तात्रय नानाभाऊ इचके (वय ३३, रा. कवठे यमाई, ता. शिरुर), श्रीहरी बाळू मिडगुले (वय ३५, रा. कान्हुर यमाई, ता. शिरुर) आणि साहेबराव उर्फ भाऊसाहेब बाबुराव मिडगुले (वय ५९, रा. कान्हुर यमाई, ता. शिरुर) यांना अटक करण्यात आली आहे.

तपासात या गांजा तस्करांचे धागेदोरे थेट ओडिशा राज्याशी आणि आंतरराज्य टोळीशी जोडले गेल्याचे निष्पन्न झाले आहे. आरोपींनी हा मुद्देमाल उडीसा येथून आणल्याचे निष्पन्न झाले असून, आरोपींच्या ताब्यातून नेक्सॉन कार, विविध बँकांची ५ एटीएम कार्ड्स, मोबाईल फोन आणि रोख रक्कम जप्त करण्यात आली आहे. या गुन्ह्यात संगमनेर, पुणे आणि इतर ठिकाणच्या अनेक फरार आरोपींचा शोध घेणे बाकी असल्याचे न्यायालयासमोर सांगण्यात आले.

न्यायालयात झालेल्या सुनावणीदरम्यान सहाय्यक सरकारी वकील मच्छिंद्र गवते यांनी न्यायालयात सरकार पक्षातर्फे युक्तिवाद केला. आरोपींनी गांजा विक्रीतून केलेले ऑनलाईन व बँकेतील आर्थिक व्यवहार तपासणे, आरोपींचे बँक स्टेटमेंट काढून चौकशी करणे तसेच इतर फरार साथीदारांचा शोध घेणे अत्यंत आवश्यक असल्याचे त्यांनी न्यायालयाच्या निदर्शनास आणून दिले. अतिरिक्त जिल्हा व सत्र न्यायाधीश मंदार नेरलेकर यांनी आरोपींना १२ तारखेपर्यंत पुन्हा पोलीस कोठडीत ठेवण्याचे आदेश दिले.

आरोपींच्या बँक खात्यांमधील आर्थिक व्यवहारांची बारकाईने माहिती मिळवून संगमनेर परिसर आणि अहिल्यानगर जिल्ह्यातील संपूर्ण गांजा रॅकेट उघडकीस आणण्यासाठी पोलीस उपनिरीक्षक सुरज मेढे पुढील तपास करीत आहे.