मतदारसंघातील वीजपुरवठ्याशी संबंधित गंभीर समस्या तातडीने सोडवण्यासाठी आमदार अमोल खताळ पाटील यांनी आक्रमक पाऊल उचलले आहे. त्यांनी मंत्रालयात ऊर्जा राज्यमंत्री मेघना बोर्डीकर यांची भेट घेऊन मतदारसंघातील वीज यंत्रणेच्या विविध प्रश्नांकडे लक्ष वेधले. या भेटीदरम्यान त्यांनी संगमनेर तालुक्यातील मेंढवन येथील मंजूर वीज उपकेंद्राचे काम त्वरित सुरू करण्याची आग्रही मागणी निवेदनाद्वारे केली.
तालुक्यातील अनेक गावे आणि वाड्या-वस्त्यांमध्ये वीजपुरवठा सातत्याने विस्कळीत होत असून, त्यामुळे शेतकरी आणि नागरिक त्रस्त झाले आहेत. शेतीच्या कृषी पंपांचा वारंवार खंडित होणारा वीजपुरवठा, नादुरुस्त होणारे ट्रान्सफॉर्मर (रोहित्र) आणि नवीन रोहित्र उपलब्ध न होणे या अडथळ्यांमुळे शेतीच्या कामांवर अत्यंत प्रतिकूल परिणाम होत आहे. ही बाब आमदार खताळ यांनी राज्यमंत्र्यांच्या निदर्शनास आणून दिली.
ग्रामीण भागातील महावितरणची यंत्रणा अधिक सक्षम करून वारंवार नादुरुस्त होणारे रोहित्र बदलून नवीन बसवण्याची गरज त्यांनी व्यक्त केली. तसेच मेंढवन येथील प्रस्तावित वीज उपकेंद्र लवकरात लवकर सुरू झाल्यास परिसरातील अनेक गावांचा वीज प्रश्न कायमस्वरूपी मार्गी लागण्यास मदत होईल, यावर आमदार खताळ यांनी भर दिला.
शेतकऱ्यांना विजेअभावी अडचणींना सामोरे जावे लागू नये आणि सर्वसामान्य नागरिकांना नियमित वीजपुरवठा मिळावा, यासाठी संबंधित महावितरण अधिकाऱ्यांना तातडीने उपाययोजना करण्याचे आदेश द्यावेत, अशी विनंती त्यांनी केली.
