MPSC आंदोलनाला डॉ. जयश्रीताई थोरात यांचा पाठिंबा; समाज आणि आयोगातील ब्लड कॅन्सर ठीक करायचाय!

महाराष्ट्र संवाद न्यूज ऑनलाईन-

पुण्यात विविध मागण्यांसाठी गेल्या नऊ दिवसांपासून सुरू असलेल्या MPSC परीक्षार्थींच्या आंदोलनाला संगमनेर तालुका युवक काँग्रेसच्या अध्यक्ष डॉ. जयश्रीताई थोरात यांनी ५० कार्यकर्त्यांसह प्रत्यक्ष भेट देऊन पूर्ण पाठिंबा जाहीर केला. महाराष्ट्र लोकसेवा आयोगाच्या कारभारावर आणि परीक्षा व्यवस्थेतील त्रुटींवर कडक शब्दांत ताशेरे ओढत, आयोगातील व समाजातील अन्यायरूपी ‘ब्लड कॅन्सर’ मुळापासून बरा करण्याची वेळ आली आहे, असे वक्तव्य त्यांनी केले. तसेच या संपूर्ण प्रकरणात दोषी असणाऱ्यांवर तातडीने जबाबदारी निश्चित करून त्यांचा राजीनामा घेण्यात यावा, अशी ठाम मागणी त्यांनी केली आहे.

आंदोलक विद्यार्थ्यांशी संवाद साधताना डॉ. थोरात म्हणाल्या की, स्वकर्तृत्वावर विश्वास ठेवून सुरू असलेला हा लढा महाराष्ट्राच्या उज्ज्वल भविष्यासाठी अत्यंत महत्त्वाचा आहे. आंदोलनादरम्यान प्रशासनाने गुन्हे दाखल केले तरी त्याला न घाबरता ते आपल्या हक्काच्या लढ्याचे ‘मेडल’ समजावे, असा धीर त्यांनी विद्यार्थ्यांना दिला.

विशेषतः कौटुंबिक व सामाजिक आव्हानांवर मात करून मोठ्या संख्येने रस्त्यावर उतरलेल्या विद्यार्थिनींच्या धैर्याचे त्यांनी कौतुक केले. या लढ्याला माजी मंत्री आमदार बाळासाहेब थोरात यांचाही पूर्ण पाठिंबा असल्याचे सांगत संत, शाहू, फुले आणि आंबेडकरांच्या विचारांचा वारसा लाभलेल्या महाराष्ट्रात अन्यायाविरुद्ध एकत्र येऊन आवाज उठवण्याचे आवाहन त्यांनी केले.

या प्रसंगी आमदार रोहित पवार, माजी मंत्री डॉ. विश्वजीत कदम, आमदार अंबादास दानवे आणि युवक काँग्रेसचे अध्यक्ष शिवराज मोरे यांच्यासह अनेक मान्यवर उपस्थित होते.

तुम्ही देत असलेला लढा तुमच्या उज्ज्वल भविष्यासाठी आहे. स्वकर्तृत्वावर विश्वास ठेवा, महाराष्ट्राला पुढे नेण्याची ताकद तुमच्यातच आहे, तसेच समाजातील व आयोगामधील ब्लड कॅन्सर ठीक करायचा आहे. – डॉ. जयश्रीताई थोरात.