माजी मंत्री बाळासाहेब थोरात यांच्या मार्गदर्शनाखाली संगमनेर तालुक्यातील विविध रस्ते मजबुतीकरणासाठी ३ कोटी रुपयांचा निधी मंजूर; आमदार सत्यजित तांबे यांच्या पाठपुराव्याला यश

महाराष्ट्र संवाद न्यूज ऑनलाईन-
भौगोलिकदृष्ट्या विस्ताराने मोठ्या असलेल्या संगमनेर तालुक्यातील ग्रामीण रस्त्यांचे जाळे अधिक भक्कम करण्यासाठी लोकनेते बाळासाहेब थोरात यांच्या मार्गदर्शनाखाली आणि आमदार सत्यजित तांबे यांच्या विशेष पाठपुराव्यातून ३ कोटी रुपयांचा निधी मंजूर करण्यात आला आहे. या निधीमुळे तालुक्यातील विविध ग्रामीण भागातील रस्त्यांच्या मजबुतीकरणाला मोठा वेग मिळणार असून, स्थानिक नागरिकांचा दळणवळणाचा प्रश्न सुटण्यास मदत होणार आहे.
देवकवठे ते बोटा असा सुमारे १०० किलोमीटरचा विस्तीर्ण विस्तार असलेल्या संगमनेर तालुक्यात पठार भाग, प्रवरा पट्टा आणि तळेगाव भाग असे तीन प्रमुख भौगोलिक भाग येतात. तालुक्यातील १७१ गावे आणि २५८ वाडी-वस्त्यांवर शाश्वत विकासाच्या योजना राबविण्यावर सातत्याने भर दिला गेला आहे. याच विकास मालिकेचा भाग म्हणून जिल्हा नियोजन समितीच्याअंतर्गत २ कोटी रुपये आणि इतर विकास निधीतून १ कोटी रुपये, असा एकूण ३ कोटी रुपयांचा निधी रस्त्यांच्या कामांसाठी प्रशासनाकडून मंजूर झाला आहे.
या निधीतून तालुक्यातील महत्त्वाच्या मार्गांचे मजबुतीकरण केले जाणार आहे. ३०५४ योजनेअंतर्गत चिखली ते जवळे कडलग रस्ता मजबुतीकरणासाठी ४० लाख रुपये मंजूर झाले आहेत. याशिवाय जवळे बाळेश्वर रस्ता, सारोळे पठार फाटा ते सारोळे पठार गाव रस्ता, शेंडेवाडी-सतीचीवाडी-डोळसणे रस्ता, तसेच शेडगाव, मालूंजे, रणखांब, कवठे मलकापूर, वरवंडी फाटा ते खांबे रस्ता या प्रत्येक कामासाठी प्रत्येकी २० लाख रुपयांचा निधी उपलब्ध झाला आहे.
तसेच जिल्हा नियोजन समितीच्या ३०५० योजनेअंतर्गत खांडगाव ते गणेशवाडी-गोडसेवाडी रस्ता, मांडवे बुद्रुक हवालदार वस्ती ते जोगे पठार घाट रस्ता, आणि धांदरफळ खुर्द माणकेश्वर मळा ते गोडसेवाडी रस्ता या कामांसाठी प्रत्येकी २० लाख रुपये मंजूर करण्यात आले आहेत. कृषी उत्पन्न बाजार समिती वडगावपान-पोखरी हवेली रस्ता, साकुर-जोगेपठार रस्ता, कुंभारवाडी ते ठाकरवाडी रस्ता, वरझडी बुद्रुक ते बोडखेवाडी रस्ता आणि नांदुरी दुमाला ते पतीगे बाबा रस्ता या कामांसाठी प्रत्येकी १५ लाख रुपयांचा निधी देण्यात आला आहे. याव्यतिरिक्त खांबा ते खरशिंदे रस्ता, कवठे मलकापूर काळे वस्ती रस्ता, डिग्रस ते हजारवाडी रस्ता, पिंपळगाव कोझिरा ते चोथेमळा रस्ता, आणि वडगाव लांडगा-जवळे कडलग-नंदनखिंड रस्ता या कामांसाठी प्रत्येकी १० लाख रुपये मंजूर झाले आहेत.
माजी मंत्री बाळासाहेब थोरात यांच्या नेतृत्वाखाली संगमनेर तालुका शिक्षण, शेती, सहकार आणि पायाभूत सुविधांमध्ये राज्यात अग्रेसर राहिला असल्याचे आमदार सत्यजित तांबे यांनी सांगितले. तालुक्यातील सर्व रस्ते दर्जेदार आणि गुणवत्तापूर्ण करून ग्रामीण भागातील जनतेला अखंडित व सुरक्षित दळणवळणाची सुविधा उपलब्ध करून देणे हेच आमचे प्राधान्य असल्याचे त्यांनी स्पष्ट केले.