जामखेड तालुक्यातील खर्डा पोलीस ठाण्यात नोंदविलेल्या दूध भेसळ प्रकरणी मुख्य आरोपी रामदास भानुदास गोपाळघरे याला न्यायालयाकडून अटकपूर्व जामीन मंजूर करण्यात आला आहे. श्रीगोंदे अतिरिक्त सत्र न्यायालयाचे न्यायाधीश डी. पी. शिंगाडे यांनी गुरुवारी या जामीन अर्जावर निर्णय दिला.
अहिल्यानगरचे अन्न सुरक्षा अधिकारी प्रदिप परशुराम पवार यांनी २९ सप्टेंबर २०२६ रोजी जामखेड तालुक्यातील नागोबाची वाडी येथे विनापरवाना ५,२७,५६० रुपये किमतीची स्किम्ड मिल्क पावडर साठवल्याप्रकरणी तक्रार दिली होती. त्यानुसार खर्डा पोलीस ठाण्यात भारतीय न्याय संहिता आणि अन्न सुरक्षा व मानके कायद्यान्वये गुन्हा दाखल करण्यात आला होता.
या प्रकरणात आरोपी रामदास गोपाळघरे यांच्या वतीने अ‍ॅड. वैभव सुरेश डोंगरे यांनी न्यायालयात बाजू मांडली. त्यांनी युक्तिवाद करताना सांगितले की, अर्जदाराकडे दुग्धजन्य पदार्थांच्या व्यवसायाचा वैध परवाना आहे. तसेच सर्वोच्च न्यायालयाच्या दाखल्यानुसार त्यांनी सदर गुन्हा दाखल करताना पोलिस यंत्रणेकडून एफ आय आर दाखल करताना झालेल्या चुका न्यायालयासमोर मांडल्या. याशिवाय, जप्त केलेला पदार्थ कोणाला विषबाधा करण्यासाठी वापरला जाणार होता याचे पुरावे नसल्याने भारतीय न्याय संहितेचे कलम १२३ या प्रकरणात लागू होत नाही, असा युक्तिवादही अ‍ॅड. डोंगरे यांनी न्यायालयात केला.
न्यायालयाने दोन्ही बाजूंचे युक्तिवाद ऐकून घेतल्यानंतर कोठडीत चौकशीची गरज नसल्याचे नमूद करत ५०,००० रुपयांच्या वैयक्तिक जातमुचलक्यावर रामदास गोपाळघरे यांचा अटकपूर्व जामीन अर्ज मंजूर केला. तसेच तपासात पोलिसांना सहकार्य करण्याचे आणि पुराव्यांशी छेडछाड न करण्याचे निर्देश न्यायालयाने आरोपीला दिले आहेत.
