अश्लील चाळे करणारे युगूल मोठ्या प्रमाणात आढळले
२८ युवक-युवतींना ताब्यात घेवून समज देत सोडले
महाराष्ट्र संवाद न्यूज नेटवर्क
संगमनेर शहर पोलिसांनी गुरुवारी दुपारी शहरातील अनेक कॉफी शॉप, कॅफे शॉपवर अचानक छापे टाकले. पोलिसांना या ठिकाणी अनेक महाविद्यालयीन युवक-युवती चाळे करतांना आढळले असून या प्रेमी युगुलांना पकडत त्यांना पोलीस ठाण्यात आणत कारवाई सुरु केली आहे. दरम्यान कारवाईचे वृत्त शहरभर पसरल्याने खळबळ उडाली आहे. कारवाईच्या ठिकाणी आणि पोलिस ठाण्यात बघ्यांनी मोठी गर्दी केल्याचे दिसून आले.
पोलिस ठाण्यात आणलेल्या युगूलांना पोलिसांनी त्यांची माहिती घेत समज देवून सोडून दिले तर कॅफे चालकांवर मुंबई पोलीस कायद्यानुसार कायदेशीर कारवाई सुरू होती. संगमनेर पोलिसांची गेल्या काही वषार्तील ही पहिलीच मोठी कारवाई आहे. एकाचवेळी शहराच्या विविध भागात पोलिसांनी ही कारवाई केली, तर काही ठिकाणी कारवाईची खबर लिक झाल्याने आलबेल आढळल्याचे बोलले जाते. दुपारी बारा वाजण्याच्या सुमारास पोलीस उपअधीक्षक राहुल मदने यांच्या मार्गदर्शनाखाली संगमनेर शहर पोलिसांनी ही कारवाई केली. या कॅफेमध्ये कॅफेच्या नावाखाली प्रेमी युगुलांना एकमेकांना भेटण्याचे अड्डे चालवले जात असल्याची व त्यांना दुष्कृत्य करण्यासाठी मोकळीक दिली जात असल्याची माहिती समोर आली आहे.
पोलिसांच्या अचानक छापेमारीमुळे प्रेमी युगूलांमध्ये एकच खळबळ उडाली असून छाप्यांच्या वेळी मोठी धावपळ झाली. बरीच तरुण जोडपी पोलिसांनी ताब्यात घेतल्याची माहिती मिळाली. ताब्यात घेतलेल्या २८ युगूलांची माहिती पोलिसांनी घेतली. दरम्यान त्यांच्याकडून लेखी घेत त्यांना काही वेळानंतर सोडून देण्यात आले. मात्र ताब्यात घेतलेल्या कॅफे चालकांवर कारवाई केली जाणार आहे. त्यामुळे त्यांच्यावर पुढे काय कारवाई होते याकडे सर्वांचे लक्ष लागून आहे.
कंपार्टमेंट तोडण्यासाठी दोन दिवसांची डेटलाईन
कॉफी कॅफेच्या नावाखाली शॉप मध्ये मुला मुलींना बसण्यासाठी वेगवेगळे कंपार्टमेंट करणे बेकायदेशीर आहे. तसे कोणालाही करता येणार नाही. कॉफी कॅफे चालवणाऱ्या मालकांना त्याबाबत कडक सूचना देण्यात आलेल्या आहेत. दोन दिवसात हे सर्व कंपार्टमेंट्स तोडून टाकले नाहीत तर त्यांच्यावर कायदेशीर कारवाई केली जाईल.
राजेंद्र भोसले, पोलीस निरीक्षक, संगमनेर शहर पोलीस ठाणे.
भाजप युवा मोर्चाने केली होती तक्रार
संगमनेर विद्येचे माहेरघर बनले आहे. येथे राज्याच्या विविध भागातुन विद्यार्थी शिक्षणासाठी येतात. मात्र कॉलेज परिसर आणि शहरातील कॉफी कॅफेच्या नांवाखाली या कॉफी कंम्पार्टमेंटमध्ये शालेय व महाविद्यालयीन युवक-युवतींना महागड्या दरात स्वतंत्र कंपार्टमेंटमध्ये अश्लील चाळे केले जातात. पदडे लावून वामकृत्यदेखील सुरु आहेत. त्यावर कारवाई करण्याच्या मागणीचे निवेदन भाजप युवा मोर्चाचे संगमनेर शहराध्यक्ष दिपेश ताटकर यांनी पोलीस शहर पोलिसांना दिले होते. त्यानंतर ही कारवाई करण्यात आली.
