महाराष्ट्र संवाद न्यूज नेटवर्क
चाळीस आमदारांनी शिवसेनेतून फुटत भाजपाशी हातमिळवणी करीत सरकार स्थापन केले असले तरी मुख्यमंत्री एकनाथ शिंदे यांच्या नेतृत्वाखालील मंत्र्यांना, शिवसेनेच्या आमदारांना नागरिकांच्या रोषाला सामोरे जावे लागत आहे, याची प्रचिती पून्हा आली. दसरा मेळाव्याच्या पार्श्वभूमीवर धुळ्यात येणाऱ्या पाणी पुरवठा मंत्री गुलाबराव पाटील यांची गाडी शिवसैनिकांनी अडविण्याचा प्रयत्न करीत त्यांच्याविरोधात जोरदार घोषणाबाजी केली.
शिंदे गटाचे आमदार संतोष बांगर यांच्यावर हल्ल्याचा प्रयत्न झाल्यानंतर शुक्रवारी पुन्हा शिवसैनिकांनी गुलाबराव पाटील यांना टार्गेट केले. यावेळी ‘पन्नास खोके गद्दार ओके’ अशी घोषणाबाजीही करण्यात आली. मंत्री झाल्यानंतर पाटील प्रथमत:च धुळे दौऱ्यावर आले होते. शिंदे गटाच्यावतीने मुंबईत बीकेसी मैदानावर होणाऱ्या दसरा मेळाव्याच्या निमीत्ताने सायंकाळी धुळ्यात सैनिक लॉन्सवर कार्यकर्त्यांचा मेळावा आयोजित करण्यात आला होता. पाटील अंमळनेरमार्गे धुळ्याकडे येत असतांना सायंकाळी साडेसहा वाजण्याच्या दरम्यान पारोळा चौफुल्यावर हा प्रकार घडला.
शिवसेनेचे जिल्हाप्रमुख अतुल सोनवणे, माजी आमदार प्रा. शरद पाटील, उपजिल्हाप्रमुख किरण जोंधळे, महानगरप्रमुख धीरज पाटील आदींनी ‘पन्नास खोके, एकदम ओके’ची जोरदार नारेबाजी केली. मंत्री पाटील यांच्या दौऱ्यावेळी अचानकपणे झालेल्या या आंदोलनामुळे पोलिसांसह प्रशासकीय यंत्रणाही काही काळ गोंधळून गेली होती.
अपर पोलीस अधीक्षक प्रशांत बच्छाव, तालुका पोलीस ठाण्याचे पोलीस निरीक्षक दत्तात्रय शिंदे यांच्यासह पोलिसांनी घटनास्थळी जात शिवसैनिक पदाधिकाऱ्यांना ताब्यात घेतले. त्यामुळे कार्यकर्ते आणि पोलिसांत काही वेळ बाचाबाचीचाही प्रकार घडला.
