महाराष्ट्र संवाद न्यूज नेटवर्क
मुख्यमंत्री एकनाथ शिंदे यांच्या हत्येचा कट रचला जात असल्याची खोटी माहिती देणाऱ्या अविनाश वाघमारे याला लोणावळा पोलीसांनी अटक केली आहे. वाघमारे याने खोडसाळपणा करत हे कृत्य केल्याचे समोर आले आहे. त्याला पोलिसांनी ताब्यात घेतल्यावर या कथित हत्येच्या धमकी प्रकरणाचा उलगडा झाला.
मुख्यमंत्री एकनाथ शिंदे यांच्यावर हल्ला करण्याचा कट रचला जातोय, अशी माहिती थेट पोलिसांच्या १०० नंबरवर देण्यात आली होती. सतर्क झालेल्या पोलिसांनी घाटकोपरमधील रहीवासी असलेल्या अविनाश वाघमारे याला ताब्यात घेतले.
वाघमारे मुंबईहून सांगलीला जात असतांना लोणावळ्यात शनिवारी रात्री हा प्रकार घडला होता. १०० नंबरवरील या कॉलमुळे पोलीस यंत्रणा सतर्क झाली होती. पोलिसांनी या कथित प्रकरणाच्या तळाशी जात संबधित वाघमारे याला ताब्यात घेतल्यानंतर या संपूर्ण प्रकरणाचा उलगडा झाला. आणि त्याने खोडसाळपणातुन हे कृत्य केल्याचे स्पष्ट झाले आहे. लोणावळा पोलीस पुढील तपास करत आहेत.
नेमके काय घडले होते
“प्रवासादरम्यान हॉटेलमध्ये पाण्याची बाटली घेण्यावरुन वाघमारेचे हॉटेल मालकासोबत वाद झाले. जास्तीचे पाच रुपये का घेता अशी विचारणा करत त्याने मालकाशी वाद घालण्यास सुरुवात केली. त्यावर मालकाने परवडत नसेल तर दुसरीकडे जा, असे प्रत्युत्तर दिले. त्यामुळे हॉटेल मालकाच्या या उत्तराने वाघमारेचा राग अनावर झाला आणि त्याने हॉटेल मालकामागे पोलिसांचा लकडा लावण्याचा विचार करत थेट १०० नंबरवर फोन करत संबधित हॉटेलमध्ये मुख्यमंत्र्यावर हल्ला करण्याचा कट रचला जात असल्याची खोटी माहिती पोलिसांना दिली होती”.
