महाराष्ट्र संवाद न्यूज नेटवर्क
अन्न औषध प्रशासनाने नाशिकरोड भागात केलेल्या तब्बल १८ लाख रुपयांचा मिक्स गुटखा, सुगंधित तंबाखू, पानमसाला व सिगारेटचा साठा जप्त करण्यात आला आहे. प्रशासनाने ज्या गोडावूनवर छापा टाकला तेथून अनेक पानटपऱ्यासह दुकानांमध्ये गुटखा पोहचविला जात असल्याचा अंदाज आहे. नाशिकरोड पोलीस ठाण्यात यासंदर्भात दोन गुन्हे दाखल करण्यात आले.
अन्न व औषध प्रशासनाच्या अधिकाऱ्यांचा दोन पथकांनी वेगवेगळ्या ठिकाणी ही कारवाई केली. अन्न सुरक्षा अधिकारी प्रमोद पाटील यांनी नाशिक रोडवरील सचदेव आर्केड या ठिकाणी असलेल्या गोडावूनवर छापा टाकला असता त्यांना तेथे ३ लाख ६१ हजार ५७० रुपयांचा वैधानिक इशारा नसलेला सिगारेटचा साठा आढळून आला. हा माल ताब्यात घेत गोडावून सील करुन सोनु लोहीया, रामविलास लोहीया, मनोज लोहीया यांच्याविरुद्ध नाशिकरोड पोलीस ठाण्यात गुन्हा दाखल करण्यात आला आहे.
दुसरी कारवाई नाशिक-पुणे महामार्गावरील शिंदे गावात करण्यात आली. अन्न सुरक्षा अधिकारी गोपाळ कासार यांनी लोहीया कंपौडमधील झेन मार्केटींगच्या दोन गोदामात छापेमारी केली. पोलीस बंदोबस्ताचा वापर करत ही गोदामे उघडण्यात आली असता दीड लाख रुपयांचा पानमसाला, १८ हजार ७५० रुपयांची सुगंधी तंबाखू, ९ लाख २१ हजाराचा राजनिवास पानमसाला, २ लाख ४० हजाराची एक्सएल सुगंधी तंबाखू, १ लाख २६ हजाराचा हिरा पान मसाला, १५ हजाराची रॉयल सुगंधी तंबाखू आणि चार हजाराची मिराज सुगंधी तंबाखू आढळून आली. मुद्देमाल जप्त करत संबधितांविरोधात गुन्हा दाखल करण्यात आला आहे. अन्न औषध प्रशासनाच्या अधिकाऱ्यांच्या या कारवाईमुळे गुटखा विक्रेत्यात भितीचे वातावरण निर्माण झाले आहे.
