महाराष्ट्र संवाद न्यूज
विवेक बुध्दीचा वापर न करता बलात्काराच्या याचिकेसोबत आक्षेपार्ह छायाचित्रे जोडल्याप्रकरणी न्यायालयाने एका वकीलाला पंचवीस हजार रुपयांचा दंड ठोठावला आहे. शिवाय याचिकेसोबत छायाचित्रे जोडतांना विवेकबुध्दीचा वापर केला नाही म्हणून संबधीत वकीलाला मुंबई उच्च न्यायालयाने चांगलेच फटकारले आहे. 
पतीविरोधातील बलात्काराचा गुन्हा आणि आरोपपत्र रद्द करण्याची मागणी करणारी याचिका आरोपी पतीच्या पत्नीने मुंबई उच्च न्यायालयात दाखल केली होती. दाखल याचिकेवर न्या. रेवती मोहिते-डेरे आणि न्या. एस. एम. मोडक यांच्या खंडपीठासमोर यासंबधीची सुनावणी सुरु होती. 
सुनावणीदरम्यान याचिकेसोबत जोडण्यात आलेली आक्षेपार्ह छायाचित्रे बघितल्यानंतर उच्च न्यायालयाने याचिकाकर्त्यांच्या वकीलांना याबद्दल चांगलेच फटकारले. शिवाय अशा प्रकारची छायाचित्रे जोडणे म्हणजे पक्षकाराच्या गोपनीयतेवर हल्ला असल्याचे सांगत संबधीत वकीलांना याचिकेमधून ते फोटो तात्काळ काढून टाकण्याचे निर्देश दिले. 
सर्वच वकील याचिकेसोबत अशा प्रकारची आक्षेपार्ह छायाचित्रे जोडतांना आपल्या विवेकबुध्दीचा वापर करतील, अशी अपेक्षा न्यायालयाने केली आहे. 
संबधीत वकीलाने या असभ्य वर्तनासाठी पंचवीस हजार रुपयांचा दंड किर्तीकर लॉ लायब्ररीकडे दोन आठवड्यात जमा करण्याचे आदेश दिले. मंगळवारी न्यायालयाने हे आदेश दिले.
