महाराष्ट्र संवाद न्यूज नेटवर्क
समृद्ध सहकाराचा वारसा लाभलेल्या संगमनेरच्या शिरपेचात आणखी एक मानाचा तुरा रोवला गेला आहे. पोस्टाच्या टपाल पाकिटावर सहकार महर्षी दिवंगत भाऊसाहेब थोरात यांची छबी आणि सहकारातील अग्रेसर राजहंस दुधची लोगोसह माहिती झळकली आहे. या टपाल पाकिटाचे लोकार्पण राज्याचे माजी मंत्री बाळासाहेब थोरात यांच्या हस्ते करण्यात आले. 
भारतीय डाक विभागातर्फे वन डिस्ट्रिक्ट वन प्रॉडक्ट अंतर्गत राजहंस दूध या विशेष टपाल पाकिटाची निर्मिती करण्यात आली आहे. या विशेष टपाल पाकिटाचे विमोचन डाक अधीक्षक हेमंत खडकीकर आणि दूध संघाचे अध्यक्ष रणजीत सिंह देशमुख यांच्या हस्ते करण्यात आले होते. त्या पाठोपाठ थोरात यांनी या पाकिटाचे एका कार्यक्रमात लोकार्पण केले. 
यावेळी आमदार डॉ. सुधीर तांबे, कांचनताई थोरात, नगराध्यक्ष दुर्गाताई तांबे, रणजीतसिंह देशमुख, इंद्रजीत थोरात, बाजीराव खेमनर, लक्ष्मण कुटे, बाबा ओहोळ, डॉ. जयश्री थोरात, डॉ. हसमुख जैन, तिकीट संग्राहक धीरज अग्रवाल, डाक विभागाचे अमोल गवांदे, अमित देशपांडे, महेश कोबारणे आदी उपस्थित होते. 
संगमनेर तालुक्यातून प्रथमत:च अशा टपाल पाकिटाची निर्मिती करण्यात आली आहे. यामुळे राजहंस दूध संघाची महती केवळ देशातच नव्हे तर जगभरात पोहोचण्यास मदत होणार आहे. राजहंस दूध संघाचे अध्यक्ष रणजीतसिंह देशमुख, कार्यकारी संचालक डॉ. सुजित खिलारी, ज्ञानेश्वर केदार यांचे यासाठी सहकार्य लाभले.
आमदार बाळासाहेब थोरात म्हणाले,
भारतीय डाक विभागाच्या पाकिटावर जागा मिळणे हा मोठा सन्मान आहे. सहकार महर्षी भाऊसाहेब थोरात यांच्या आदर्श तत्त्वांवर संगमनेरच्या सर्व सहकारी संस्थांचा कारभार सुरू आहे. या सहकारामधील विविध संस्थांनी देशपातळीवर लौकिक मिळवला असून राजहंस दूध संघाने ही आपला मोठा लौकिक निर्माण केला आहे. गुजरात, कर्नाटकसह मराठवाडा विदर्भात या दुधाला मोठी मागणी आहे. राजहंस टपाल पाकिटावर आल्याने संपूर्ण भारतभर राजहंस दुधाचा गौरव होईल.
