महाराष्ट्र संवाद न्यूज नेटवर्क
शहर पोलिस ठाण्यात दाखल असलेल्या गुन्ह्याचा तपास पोलीस उपनिरीक्षक निवांत जाधव यांच्याकडून काढून त्यांची चौकशी करण्याची तसेच या गुन्ह्यात आणखी दोघा आरोपींची नांवे समाविष्ठ करण्याची मागणी शिवसेनेचे शहराध्यक्ष अमर कतारी व फिर्यादी जतीन बत्रा यांनी नाशिक परिक्षेत्राचे पोलिस महानिरीक्षक डॉ. बी. जी. शेखर यांच्याकडे केली आहे. या प्रकरणात शहरातील नामांकित वकील व भारतीय जनता पक्षाचे शहराध्यक्ष श्रीराम गणपूले यांच्यावरदेखील कतारी व बत्रा यांनी गंभीर स्वरुपाचे आरोप केल्याने या गुन्ह्याने वेगळे वळण घेतले आहे. शेखर याप्रकरणी काय भूमिका घेतात, याकडे लक्ष लागले आहे.
शिवसेना शहराध्यक्ष कतारी व भाजपचे शहराध्यक्ष गणपूले यांच्यात गेल्या काही दिवसांपासून संघर्ष सुरु आहे. त्यांच्यात आरोप-प्रत्यारोपाच्या फैरी झडत असल्याने या दोन्ही शहराध्यक्षांमधील वाद विकोपाला गेल्याचे दिसते. यातच पोलिस ठाण्यात दाखल असलेल्या एका प्रकरणात मुख्य सूत्रधार श्रीराम गणपूले असल्याची व त्यांच्याविरोधात फसवणूकीच्या उद्देशाने प्रॉपर्टीचे खोटे व बनावट सर्च रिपोर्ट तयार दिल्याची तक्रार करण्यात आली आहे. त्यामुळे त्यांच्याविरोधात फसवणूकीचा गुन्हा दाखल करण्याची मागणी करण्यात आली आहे. 
तसेच पोलिस ठाण्यात फिर्यादी जतीन बत्रा यांच्या तक्रारीवरुन दाखल असलेल्या २५ लाख रुपयांच्या फसवणूकीच्या या गुन्ह्याचा तपास पोलिस उपनिरीक्षक निवांत जाधव यांच्याकडे आहे. जाधव यांनी तक्रारदाराने वारंवार सांगूनदेखील त्याच्या सांगण्यानुसार आरोपींविरोधात गुन्हा दाखल केला नाही. उलट या प्रकरणी आर्थिक तडजोड करुन आरोपीला फायदा होण्याच्या दृष्टीने तपासात कसूर करणे व जाणून बुजून गुन्ह्यातून आरोपीची नांवे करुन सोयीनुसार गुन्हा दाखल केला आहे. त्यामुळे न्यायालयाच्या आदेशानुसार संबधीतांवर कडक फौजदारी कारवाईची मागणी करण्यात आली आहे.
सदर गुन्ह्यात तपास अधिकाऱ्यांनी आणखी दोन आरोपींची नांवे समाविष्ठ केलेली नाही. फिर्यादीने गुन्हा दाखल करतांना वेळोवेळी तपास अधिकारी व ठाणे अंमलदार यांना विनंती केली, अर्ज दिले व गुन्ह्यात दोघा आरोपींची नांवे वाढविण्याची मागणी केली. व्यवस्थापक कॅप्री ग्लोबल कॅपिटल लिमीटेड व मुख्य सुत्रधार श्रीराम गणपुले यांनी आर्थिक फसवणूक केल्याची तक्रार केली, 
मात्र गुन्हा दाखल करुन घेतांना जाधव यांनी यातील दोन आरोपींना अभय देत केवळ शाम सोमनाथ माळवे याच्याविरोधात गुन्हा दाखल केला. जाधव यांचे वर्तन आरोपींना मदत करणारे असल्याने त्यांच्याकडून या गुन्ह्याचा तपास काढून घेत त्यांची चौकशी सक्षम अधिकाऱ्यामार्फत करण्याची तसेच श्रीराम गणपूले व कॅप्री ग्लोबल कॅपिटल कंपनीचे व्यवस्थापक यांच्यावरही गुन्हा दाखल करण्याची मागणी केली आहे.
