महाराष्ट्र संवाद न्यूज नेटवर्क
सहकारी साखर कारखानदारीत अवघ्या देशासाठी अनुकरणीय ठरलेल्या संगमनेरच्या सहकार महर्षी भाऊसाहेब थोरात सहकारी साखर कारखान्याचे अध्यक्ष बाबा ओहोळ यांची महाराष्ट्र राज्य सहकारी साखर संघाच्या संचालकपदी निवड करण्यात आली आहे.
माजी मंत्री काँग्रेसचे विधिमंडळ पक्षनेते आणि विद्यमान आमदार बाळासाहेब थोरात यांच्या अधिपत्याखाली असलेल्या सहकार महर्षी भाऊसाहेब थोरात साखर कारखान्याने साखर कारखानदारीत वेगवेगळे उच्चांक प्रस्थापित केले आहेत. ऊस उत्पादकांना सर्वाधिक भाव देणारा साखर कारखाना म्हणून या कारखान्याने राज्यभरात ख्याती मिळविली आहे. 
या कारखान्याला राष्ट्रीय पातळीवरील उत्कृष्ट ऊस विकासाचा पुरस्कार देखील मिळालेला आहे. याशिवाय या कारखान्याचे कार्यकारी संचालक जगन्नाथ घुगरकर यांनादेखील गोवा येथे एका कार्यक्रमात उत्कृष्ट कार्यकारी संचालक म्हणून गौरविण्यात आले आहे.
राज्य सहकारी साखर संघाच्या माध्यमातून सहकारी साखर कारखान्यांची गुणवत्ता वाढ, शेतकरी आणि साखर कारखानदारीच्या समस्या, शेतकऱ्यांना रास्त भाव, ऊस दरासाठी देण्यात येणारा एफआरपी, साखर कारखान्यांना होणारा वित्तीय पुरवठा, साखर कारखानदारीतील व्यावहारिक अडचणी, साखर निर्याती संदर्भातील प्रश्न आदी विविध प्रश्नांसंदर्भात केंद्र आणि राज्य सरकारकडे सातत्याने पाठपुरावा करण्याचे काम राज्य साखर संघाच्या माध्यमातून होत असते.
याशिवाय कारखान्यांची गुणवत्ता पूर्ण वाढ, त्यांचा आर्थिक वाणिज्य विषयक कारभार विकासाभिमुख कसा होईल या दृष्टीनेही साखर संघाच्या माध्यमातून प्रयत्न केले जातात. अशा राज्य साखर संघावर संगमनेर मधून बाबा ओहोळ यांची नियुक्ती करण्यात आली आहे.
ओहोळ यांचे आमदार बाळासाहेब थोरात, आमदार डॉ. सुधीर तांबे, संगमनेरच्या नगराध्यक्ष दुर्गाताई तांबे, राजहंस दूध संघाचे अध्यक्ष रणजीतसिंह देशमुख, शेतकरी विकास मंडळाचे अध्यक्ष बाजीराव खेमनर, जिल्हा बँकेचे उपाध्यक्ष माधवराव कानवडे, प्रदेश युवक काँग्रेसचे माजी प्रदेशाध्यक्ष सत्यजित तांबे, डॉ. जयश्री थोरात, इंद्रजीत थोरात, मिलिंद कानवडे, सोमेश्वर दिवटे आदींनी अभिनंदन केले आहे.
