महाराष्ट्र संवाद न्यूज नेटवर्क
नवीन ट्रॅक्टर घेण्यासाठी पत्नीने माहेराहून पाच लाख रुपये आणावेत, या कारणासाठी तिचा छळ करुन खून केल्याच्या आरोपातून पती सुरेश पंकज बिबवे याच्याबरोबर सर्व आरोपींची संगमनेरच्या अतिरिक्त जिल्हा व सत्र न्यायालयाने निर्दोष मुक्तता केली आहे.
संगमनेर तालुक्यातील निमज येथे २०१७ मध्ये हा प्रकार घडला होता. याप्रकरणी संगमनेर पोलीस ठाण्यात सुजीत पावसे याच्या तक्रारीवरुन विवाहितेचा पती सुरेश बिबवे, सासरा पंकज लक्ष्मण बिबवे, अमोल पंकज बिबवे, मंगल पंकज बिबवे, अविनाश लक्ष्मण बिबवे, सुरेखा अविनाश बिबवे, वच्छला लक्ष्मण बिबवे आणि लक्ष्मण बुवाजी बिबवे यांच्याविरोधात भारतीय दंड विधानाच्या विविध कलमान्वये गुन्हा दाखल करण्यात आला होता. आरोपींना अटक करत तत्कालिन पोलीस निरीक्षक गांगुर्डे यांनी यासंदर्भात तपास करुन आरोपीविरोधात न्यायालयात दोषारोप पत्र दाखल केले होते.
या खटल्याची सुनावणी अतिरिक्त जिल्हा व सत्र न्यायाधीश प्रकाश कुलकर्णी यांच्यासमोर सुरु होती. सरकारच्यावतीने खटल्यात बारा साक्षीदारांच्या साक्षी नोंदविण्यात आल्या. तर आरोपीच्या वकीलांनी साक्षीदारांनी सदर घटना ४०० ते ५०० फुट अंतरावरुन बघितल्याचे म्हटले असल्याचे साक्षीत म्हटले. इतक्या दूरवरुन घटना स्पष्ट दिसू शकत नाही. तसेच मध्ये असलेल्या ५-६ फुट उंचीच्या तारा, ८-१० फुट उंचीचे गिन्नी गवत या अडथळ्यामुळे घटना व्यवस्थित दिसू शकत नसल्याचे, घटनेवेळी आरोपी व्यतिरिक्त इतर अनोळखी लोक उपस्थित असल्याचा परिस्थितीजन्य पुरावा, एकाच व्यक्तीला मारण्यासाठी चार वेगवेगळी हत्यारे वापरु शकत नाही. याशिवाय आरोपीच्या पत्नीने कधीही पतीने मारहाण केल्याची तक्रार केलेली नसल्याचे न्यायालयाच्या निदर्शनास आणले.
सरकार पक्ष आणि आरोपीच्या वकीलांनी केलेला युक्तीवाद, पुरावे, साक्षीदारांच्या साक्षी आदींचा बारकाईने अभ्यास करत न्यायाधीश कुलकर्णी यांनी आरोपींना निर्दोष ठरविले.
आरोपीच्या वतीने वकील राजू खरे यांनी काम बघितले. त्यांना विजय देवगिरे, सुहास गोर्डे या वकीलांनी सहाय्य केले.
