आयुक्त तुकाराम मुंढेनी सुनावले… खासगी प्रॅक्टिस कराल तर धरावा लागेल घरचा रस्ता

महाराष्ट्र संवाद न्यूज नेटवर्क
आता सरकारी रुग्णालयातील डॉक्टरांनी प्रायव्हेट प्रॅक्टिस केली तर त्यांना थेट सेवेतून डिसमिस केले जाणार आहे. प्रायव्हेट प्रॅक्टिस करणाऱ्यांसाठी हा शेवटचा इशारा असेल, रुग्णांच्या उपचारात हलगर्जीपणा आणि हेळसांड सहन केली जाणार नाही असे सांगत डॅशिंग आयुक्त तुकाराम मुंढे यांनी आरोग्य विभागातील अधिकारी-कर्मचाऱ्यांची चांगलीच झाडाझडती घेतली.धडाकेबाज निर्णय आणि कायद्याच्या कठोर अंमलबजावणीसाठी डॅशिंग अधिकारी म्हणून नावलौकिक असलेल्या तुकाराम मुंढे यांनी आरोग्य सेवा तथा संचालक राष्ट्रीय आरोग्य अभियान या पदाचा पदभार घेताच पुन्हा एकदा धडाकेबाज निर्णयांना सुरुवात केली आहे. याची प्रचिती त्यांच्या मराठवाड्यातील दौऱ्यात आली आहे. आरोग्य विभागाचा पदभार हाती घेतल्यानंतर मुंढे मराठवाड्यातील बीडच्या जिल्हा रुग्णालयात आले होते. यावेळी त्यांनी घेतलेल्या आढावा बैठकीत सर्वांचीच कान उघडणी केली. राज्यभरातील अनेक आरोग्य अधिकारी सरकारी रुग्णालयात कमी आणि आपल्या खाजगी ओपीडीमध्ये जास्त, असे चित्र सर्रासपणे आढळून येत होते. मुंढे यांच्या अचानक दिलेल्या भेटीतही हाच अनुभव आला. अनेकदा यावर ओरड होऊनदेखील फारसा फरक पडत नव्हता. त्यामुळे आरोग्य संचालनालयाचा पदभार नव्याने हाती घेतलेल्या मुंडे यांच्या या शेवटच्या वार्निंगने राज्यातील आरोग्य अधिकारी आता चांगलेच धास्तावले आहेत. तुकाराम मुंढे यांनी मराठवाडा दौऱ्याला सुरुवात केली असून अचानकपणे रुग्णालयांना भेटी देत गैरहजर कर्मचाऱ्यांवर कारवाईला सुरुवात केली आहे. बीड जिल्हा रुग्णालयातील अतिदक्षता विभाग, प्रसूती वॉर्ड आणि फीव्हर क्लिनिकला त्यांनी भेट दिली. यावेळी तेथील डॉक्टर उपस्थित नव्हते. तेथे खासगी डायग्नोसिस सेंटरद्वारे आलेल्या रिपोर्टच्या आधारे रुग्णांवर उपचार सुरू होते. तसेच नवोदित बाळाला पोलिओ डोस दिल्याचे बेबी कार्ड तयार करण्यात आलेले नव्हते. यावरून त्यांनी तेथील अधिकारी आणि कर्मचाऱ्यांना चांगलेच सुनावले. मुंढे यांनी ३१ ऑक्टोबरपर्यंत अहवाल पाठविण्याचे आदेश लातूरच्या आरोग्य उपसंचालकांना दिले असून जिल्हा शल्य चिकित्सक डॉ. सुरेश साबळे, जिल्हा आरोग्य अधिकारी डॉ. अमोल गीते यांना कारभारात सुधारणा करण्याच्या सूचना केल्या.जिल्हाधिकारी कार्यालयातील आढावा बैठकीदरम्यान मुंढे यांनी बेजबाबदार अधिकाऱ्यांची खरडपट्टी काढत तालुका आरोग्य अधिकारी यांनी खासगी प्रॅक्टिस करू नये, असे आढळल्यास सेवेतून डिसमिस करण्याचा इशारा दिला आहे.