महाराष्ट्र संवाद न्यूज नेटवर्क
गांजाची राजधानी म्हणून ओळखल्या जाणाऱ्या संगमनेरमध्ये 172 किलो गांजा सह तब्बल 24 लाखाच्या माध्यमातून हस्तगत केल्याची घटना शनिवारी रात्री घडली. याप्रकरणी पोलिसांनी दोन आरोपींना अटक केली असून या गांजा प्रकरणी सखोल तपास करून याची पाळमुळे शोधण्याचे आव्हान शहर पोलिसांसमोर उभे ठाकले आहे.
पोलीस पोलीस या प्रकरणाच्या मुळाशी जातात की संबंधितांना क्लीन चिट देतात हे येत्या काही दिवसात स्पष्ट होईलच. संगमनेर शहरानजीक कोल्हार-घोटी राज्यमार्गावर समनापुर शिवारात शहर पोलिसांनी ही कारवाई केली. एका ब्रिझा कारमधून कोल्हार घोटी मार्गावरील लोणी कडून संगमनेरच्या दिशेने गांजा आणला जात असल्याची माहिती पोलिसांना मिळाली होती. त्यामुळे पोलिसांचे पथक संशयित वाहनाची तपासणी करण्यासाठी समनापुर जवळील नसीब वडापाव सेंटर जवळ थांबले होते. संशयास्पद ब्रिझा कार (एम.एच. 50 एल 9970) तेथे आली असता पोलिसांनी कार चालकाकडे चौकशी केली असता त्याने उडवाउडवीची उत्तरे दिली.
पोलीस पथकाने कारची तपासणी केली असता त्यामध्ये त्यांना 15 लाख 55 हजार 740 रुपये किमतीचा उग्र वास असलेला 172 किलो 80 ग्राम गांजा आढळून आला. त्यामुळे संशयितांनी घटनास्थळावरून पळ काढण्याचा प्रयत्न केला मात्र पोलीस बळापुढे त्यांचे प्रयत्न फोल ठरले. पोलिसांनी कारमधील दोघा संशयीतांसह त्यांच्याकडील मोबाईल आणि कार असा सुमारे 24 लाख रुपयांचा मुद्देमाल ताब्यात घेत पोलीस ठाण्यात आणला.
पोलीस ठाण्यात आल्यानंतर आरोपी संदीप लक्ष्मण भोसले (वय 35 वर्षे, रा. मलकापूर, ता. कराड, जि. सातारा) आणि बाळासाहेब भाऊसाहेब शिंदे (वय 30 वर्ष रा. वडगाव सावताळ, ता. पारनेर जि. अहमदनगर) या दोघा आरोपीं विरोधात पोलीस उपअधीक्षकांच्या कार्यालयातील पोलीस नाईक अण्णासाहेब दातीर यांच्या तक्रारीवरून गुन्हा दाखल करण्यात आला आहे. उपनिरीक्षक निवांत जाधव पुढील तपास करत आहेत.
“पोलीस उपाधीक्षकांची पत्रकार परिषद आणि माहिती लिक”
अनेक महत्त्वपूर्ण कारवायांमध्ये वरिष्ठ पोलीस अधिकारी पत्रकार परिषदा घेऊन माध्यमांना माहिती देत असतात. एकाच वेळी सर्व माध्यमांना जबाबदार अधिकाऱ्याकडून पत्रकार परिषदेत माहिती देण्याचा प्रकार आहे. मात्र संगमनेरात अशा मोठ्या कारवाया नंतर काही माध्यमांना आधीच माहिती पुरविली जाते आणि त्यानंतर पत्रकार परिषदेत पुन्हा ही माहिती उर्वरित पत्रकारांना दिली जाते. पत्रकार परिषदेत आधीच या कारवायांच्या बातम्या समाज माध्यमातून फिरत असतात त्यामुळे पोलीस अधिकाऱ्यांच्या पत्रकार परिषदा केवळ फार्स ठरत असल्याचे दिसते.
