महाराष्ट्र संवाद न्यूज
गेल्या तीन दिवसापासून शहर व परिसरात सातत्याने अज्ञात व्यक्तींचे मृतदेह आढळत आहेत. शुक्रवारी सकाळीही शहरानजीकच्या संगमनेर-सुकेवाडी रस्त्यावरील नाल्यात आढळला तरुणाचा मृतदेह आढळून आला मृत व्यक्तीच्या शरीरावर जखमा असल्याने हा घातपाताचा प्रकार असल्याचा संशय वर्तविला जात असून त्या दृष्टीने पोलिसांकडून तपास सुरु करण्यात आला आहे.
सुकेवाडीकडे जाणार्या पुनर्वसन वसाहतीच्या काही अंतरावरील नाटकीनाल्यात एका तरुणाचा मृतदेह पडलेला असल्याची माहिती शहर पोलिसांना मिळाली होती. पोलिसांनी मृतदेह ताब्यात घेऊन शवविच्छेदनासाठी संगमनेर पालिकेच्या कुटीर रुग्णालयात आणला आहे. अनोळखी तरुणाचा मृतदेह आढळल्याने सर्वप्रथम त्याची ओळख पटविण्याचे मोठे आव्हान शहर पोलिसांसमोर निर्माण झाले आहे.
दरम्यान नाल्यात आढळलेल्या शरीरावर मारहाणी सदृश्य जखमा आढळून आल्याने या व्यक्तीचा घातपात झाला असावा, असा संशय निर्माण झाला आहे. शवाविच्छेदन अहवाल आल्यानंतर या व्यक्तीचा मृत्यू कसा झाला याचे कारण स्पष्ट होईल. सदरचा तरुण कोण, तो येथे कसा आला, त्याचा मृत्यू घातपाताने झाला की अन्य कोणत्या कारणाने याचा पोलीस शोध घेत आहेत. 
या संदर्भात अकस्मात मृत्यूची नोंद करण्यात आली असून मृतदेह आढळून आलेल्या अज्ञात व्यक्तीच्या संदर्भात कोणाला काही माहिती असल्यास त्यांनी शहर पोलिसांची संपर्क साधण्याचे आवाहन शहर पोलीस ठाण्याचे प्रभारी पोलीस निरीक्षक राजेंद्र भोसले यांनी केले आहे.
