महाराष्ट्र संवाद न्यूज
संगमनेर शहरानजिक सुकेवाडी रस्त्यावरील नाल्याच्या कडेला आढळलेल्या मृतदेहाची ओळख पटविण्यात व त्याची हत्या झाल्याचा निष्कर्ष काढण्यात शहर पोलिसांना यश आले असले तरी या तरुणाची हत्या कशासाठी करण्यात आली आणि कोणी केली याचा शोध मात्र अद्याप पोलिसांना लागलेला नाही. त्यामुळे या खुनाची उकल करण्याचे आव्हान पोलीस यंत्रणेसमोर उभे आहे.
शुक्रवारी सकाळी सुकेवाडी रस्त्यावर पुनर्वसन वसाहतीच्या जवळ असलेल्या नाल्याच्या कडेला एका अज्ञात व्यक्तीचा मृतदेह आढळून आला होता. या व्यक्तीचा घातपात झाल्याचा प्राथमिक निष्कर्ष असल्याने त्याचे छायाचित्र पोलिसांनी समाज माध्यमांवर प्रकाशित केले होते. समाज माध्यमाच्या मदतीने पोलिसांना मृताची ओळख पटवण्यात यश आले. मृत तरुण हा अकोले तालुक्यातील नवलेवाडी येथील असल्याचे आणि त्याचे नाव संकेत सुरेश नवले असल्याचे स्पष्ट झाले.
संकेत नवले हा संगमनेरच्या अमृतवाहिनी महाविद्यालयामध्ये अभियांत्रिकीचे शिक्षण घेत होता. शिक्षणासाठी तो संगमनेरमध्ये घुलेवाडीत राहत होता. या तरुणाची डोक्यात मारून हत्या करण्यात आल्याचा निष्कर्ष पुढे आला असून शहर पोलीस निरीक्षक राजेंद्र भोसले आणि पोलीस उपाधीक्षक संजय सातव यांची तपास पथके आरोपीचा शोध घेत आहे. त्यादृष्टीने मृत तरुणांच्या महाविद्यालयीन मित्राकडून देखील माहिती मिळविली जात आहे.
मृत तरुणाची ओळख पटविण्यात पोलीस यशस्वी झाले असले तरी त्याची हत्या कोणी, का आणि कशासाठी केली याची पोलिसांना उकल करावी लागणार आहे. घटनेला चोवीस तासांपेक्षा अधिक कालावधी उलटून गेला असला तरी पोलिसांच्या हाती या खून प्रकरणासंदर्भात नेमकी काय माहिती लागले याची माहिती मिळू शकली नाही.
सकृत दर्शनी घटनास्थळी पोलिसांना तपासासाठी आवश्यक असणारी फारशी माहिती मिळाली नसली तरी पोलीस यंत्रणा आरोपी शोधण्याच्या मागे लागलेली आहे.
