महाराष्ट्र संवाद न्यूज नेटवर्क
अहमदनगर : १ जानेवारी रोजी कोरेगाव-भीमा येथील विजयस्तंभास अभिवादन करण्यासाठी होणारी गर्दी लक्षात घेऊन नगर-पुणे महामार्गावरील बेलवंडी फाटा आणि नगरहून सरळ पुण्याकडे जाणारी वाहतूक दोन दिवसांसाठी पर्यायी मार्गाने वळवण्यात आली आहे. त्यामुळे ३१ डिसेंबर ते २ जानेवारी रोजी सकाळी सहा वाजेपर्यंत पर्यायी मार्गाचा वापर करावा लागणार आहे. पोलिस अधीक्षक राकेश ओला यांनी याबाबत आदेश काढले आहेत.
अहमदनगरकडून पुण्याकडे जाणाऱ्या महामार्गावरून जाणाऱ्या वाहन धारकांसाठी पर्यायी मार्ग..
बेलवंडी फाटा येथून पुण्याकडे जाणाऱ्या वाहतुकीसाठी बेलवंडी फाटा, दैवदैठण, ढवळगाव, पिंपरी कोळंडर, उक्कडगाव, बेलवंडी, नगर-दौंड महामार्गावरून लोणी व्यंकनाथ, मढेवडगाव, काष्टी, दौंड-सोलापूर-पुणे महामार्गामार्गे पुण्याकडे जावे लागेल.
तर नगरकडून पुण्याकडे जाणारी सर्व प्रकारची वाहतूक कायनेटीक चौक, केडगाव बायपास, अरणगाव बायपास, लोणी व्यंकनाथ, मढेवडगाव, काष्टी, दौंड-सोलापूर-पुणे महामार्गावरून वळवण्यात आली आहे.
तरी अहमदनगरकडून पुण्याकडे जाणाऱ्या महामार्गावरून जाणाऱ्या वाहन धारकांनी पर्यायी मार्गाचा वापर करावा असे आवाहन पोलीस अधीक्षक राकेशकुमार ओला यांनी केले आहे.
