महाराष्ट्र संवाद न्यूज
पुणे – एमपीएससी परीक्षेमध्ये राज्यात सहाव्या आलेल्या अहमदनगर जिल्ह्यातील कोपरगावच्या 26 वर्षीय दर्शना पवार हिचा संशयास्पद मृत्यू प्रकरणाला वेगळ वळण मिळाल आहे. दर्शनाच्या डोक्यात आणि शरीरावर आढळलेल्या गंभीर जखमांमुळे तिच्या मृत्यू झाल्याचा अहवाल पोस्टमार्टम रिपोर्टमधून समोर येत आहे. त्यामुळे अज्ञात व्यक्ती विरोधात वेल्हे पोलीस ठाण्यात खुनाचा गुन्हा दाखल करण्यात आला असून पोलिसांची पाच पथके आरोपीचा शोध घेत आहे.
दर्शना पवार हिचा मृतदेह राजगड किल्ल्याच्या पायथ्याला कुजलेल्या अवस्थेत रविवारी आढळून आल्याने याप्रकरणी वेल्हे पोलीस ठाण्यात अकस्मात मृत्यूची नोंद करण्यात आली होती. आता मात्र पोलिसांनी खुनाचा गुन्हा दाखल केला असून त्या दृष्टीने तपास सुरू केला आहे. दर्शना दत्ता पवार ही मुळची अहमदनगर जिल्ह्यातील कोपरगावची आहे. गेल्या काही वर्षांपासून ती स्पर्धा परिक्षेचा अभ्यास करत होती. स्पर्धा परीक्षेच्या माध्यमातून फॉरेस्ट ऑफिसर म्हणून तिने राज्यातून सहाव्या क्रमांकाने यश मिळवले होते.
त्यामुळे पुण्यातील एका अॅकडमीच्यावतीने आयोजित करण्यात आलेल्या सत्कार समारंभासाठी ती 9 जूनला पुण्यात आली होती आणि नर्हे येथील एका मैत्रिणीकडे राहत होती. 12 जूनला तिने आपल्या मैत्रिणीला सिंहगड किल्ल्यावर ट्रेकींगसाठी जात असल्याचे सांगितले होते. कुटुंबाला देखील याबाबत तिने कल्पना दिली होती.
मात्र, त्यानंतर ती बेपत्ता झाली. तिचा फोन बंद झाला आणि फोन बंद झाल्यामुळे तिच्या कुटुंबाने तीन दिवस तिचा शोध घेतला. पण ती सापडली नाही. त्यामुळे ती बेपत्ता झाल्याची तक्रार सिंहगड रोड पोलीस ठाण्यात नोंदविण्यात आली होती.
रविवारी राजगड किल्ल्याच्या पायथ्याला झाडांमध्ये दर्शनाचा कुजलेल्या अवस्थेत तिचा मृतदेह आढळून आला. तिचा मोबाईल आणि इतर वस्तू त्याठिकाणी आढळून आल्या. सिंहगड किल्ल्यावर जातेवेळी तिच्यासोबत नाशिक जिल्ह्यातील राहुल दत्तात्रय हंडोरे हा देखील असल्याची माहिती समोर आली आहे. राजगडावर हे दोघेही दुचाकीवरून गेले होते. दोघेही गडावर सोबत जात होते मात्र नंतर राहुल एकटाच परत येत असल्याची माहिती जवळच्या सीसीटीव्हीतून समोर आली आहे.
राहुल हा देखील बेपत्ता असून पोलिसांची संशयाची सुई त्याच्या दिशेने आहे. राहुल हंडोरे यांच्या मोबाईलचे लोकेशन पोलिसांना परराज्यात दिसत असून त्याने दुसऱ्याच्या फोनवरून घरच्यांसोबत संपर्क साधला असल्याची माहिती पुढे आली आहे. राहुल पोलिसांसमोर आल्यानंतरच या घातपात प्रकरणाचा उलगडा होण्यास मदत होणार आहे.
दरम्यान या संदर्भात वेल्हे पोलीस ठाण्यात आता खुनाचा गुन्हा दाखल करण्यात आला असून पोलिसांची पाच पथके आरोपीच्या शोधासाठी तैनात करण्यात आली आहे.
