महाराष्ट्र संवाद न्यूज
मुंबई – राष्ट्रवादी काँग्रेस पक्षातील फुटीनंतर विरोधी पक्ष नेते असलेले अजित पवार राज्याच्या उपमुख्यमंत्रीपदी आरूढ झाले. त्यामुळे शरद पवार यांनी जितेंद्र आव्हाड यांचे नाव विरोधी पक्ष नेते पदासाठी जाहीर केले. मात्र आता काँग्रेसनेच या पदावर दावा केला आहे. ज्यांचे संख्याबळ जास्त त्यांचाच विरोधी पक्ष नेता असेल असे सांगत आमदार बाळासाहेब थोरात यांनी काँग्रेसचाच विरोधी पक्षनेता होणार असल्याचे संकेत दिले.
थोरात म्हणाले, राज्यात सत्तेवर असलेले शिंदे-फडणवीस-पवार सरकार जर सत्तेतून खाली खेचायचे असेल तर आपल्याला महाविकास आघाडी भक्कम ठेवावी लागणार आहे, पावसाळी अधिवेशनापूर्वी काँग्रेस पक्षश्रेष्ठींकडून विरोधी पक्ष नेत्याचे नाव घोषित केले जाईल. काँग्रेस सभागृहातील 45 आमदार असलेल्या सर्वात मोठा विरोधी पक्ष आहे.
अधिवेशनाच्या आधी विरोधी पक्षानेतेबाबत एकत्र बसून निर्णय घेऊ. सर्व आमदारांची बैठक आयोजित करण्यात आली आहे. या बैठकीत अनेक विषयांवर चर्चा देखील होणार आहे, असे ते म्हणाले. दरम्यान एकीकडे विरोधी पक्षनेते पदासाठी दावा करत असताना दुसरीकडे आमची महाविकास आघाडी पूर्वीपेक्षा अधिक भक्कम असल्याचे देखील बाळासाहेब थोरात यांनी म्हटले आहे.
राज्यातील महाविकास आघाडीचे सरकार कोसळल्यानंतर विरोधी पक्षनेते पद राष्ट्रवादी काँग्रेसकडे होते. अजित पवार विरोधी पक्षनेते होते. मात्र त्यांनीच बंद करत शिंदे-फडणवीस सरकारमध्ये सहभागी होण्याचा निर्णय घेतला. त्यामुळे आघाडीमध्ये असलेल्या राष्ट्रवादी काँग्रेसचे संख्या व कमी झाले आहे. त्यामुळे काँग्रेस पक्षाकडून विधिमंडळात विरोधी पक्ष नेते पदावर दावा केला जाणार असल्याचे संकेत मिळत आहे. त्यामुळे वेळ पडल्यास राष्ट्रवादी काँग्रेसला या पदावरील आपला हक्क सोडावा लागणार आहे.
काँग्रेसकडून विरोधी पक्षनेते पदासाठी यांची नावे चर्चेत…
राजकीय घडामोडीनंतर सभागृहातील सर्वात मोठा पक्ष ठरलेल्या काँग्रेसला विरोधी पक्षनेते पद मिळाल्यास काँग्रेस कडून या पदासाठी ज्येष्ठ नेते माजी मंत्री, आमदार बाळासाहेब थोरात, माजी मुख्यमंत्री अशोक चव्हाण, प्रदेशाध्यक्ष नाना पटोले यांची नावे चर्चेत आहेत.
