महाराष्ट्र संवाद न्यूज
मुंबई – राष्ट्रवादीत बंड करत उपमुख्यमंत्री झालेल्या अजित पवारांना अखेर मंत्रालयात कार्यालयासाठी जागा मिळाली. पाच दिवसांच्या शोध मोहिमेनंतर अजित पवारांना मंत्रालयातील मुख्य इमारतीमध्ये सहाव्या मजल्यावर शासकीय कार्यालय देण्यात आलं आहे.
मंत्रीपदाची शपथ घेतल्यानंतर अजित पवारांना मंत्रालयात नेमकं कुठलं कार्यालय देणार यावरून राजकीय क्षेत्रात जोरदार चर्चा रंगली होती. आतापर्यंत मुख्यमंत्री आणि उपमुख्यमंत्री यांची सहाव्या मजल्यावर एकच कार्यालय होते. मात्र, अजित पवार उपमुख्यमंत्री झाल्यानंतर त्यांना मुख्यमंत्री एकनाथ शिंदे आणि उपमुख्यमंत्री देवेंद्र फडणवीस यांच्या मधलं कार्यालय देण्यात आलं आहे.
पवार यांच्या कार्यालयासाठी मुख्यमंत्र्यांचे प्रधान सचिव ब्रिजेश सिंह, उपमुख्यमंत्री देवेंद्र फडणवीस यांचे सचिव श्रीकर परदेशी या दोघांचेही कार्यालय रिकामे करण्यात आले आहे. या कार्यालयाचे सध्या कामकाज सुरू असून हे कार्यालय पूर्णत: तयार झाल्यानंतर अजित पवारांना या ठिकाणी बसण्याची व्यवस्था केली जाईल.
अजित पवारांना मंत्रालयात कार्यालय मिळाले असले तरी त्यांच्यासोबत असलेल्या 8 मंत्र्यांना अद्याप कार्यालय मिळाला नसून त्यांनादेखील लवकरच कार्यालय दिलं जाणार आहे. चौथा मजला सोडला तर इतर सर्व मजल्यावरील काही मंत्र्यांची अतिरिक्त कार्यालय त्यासाठी रिकामी केली जात आहेत. तसेच जी कार्यालयं बंद होती. ती कार्यालयं आता सुरू केली जाणार असून या कार्यालयातून आता राज्याचा गाडा हाकला जाणार आहे.
