महाराष्ट्र संवाद न्यूज
संगमनेर – आगामी काळ हा निवडणुकांचा राहणार असून नगरपरिषद पंचायत समिती आणि जिल्हा परिषदेसह इतर स्थानिक स्वराज्य संस्थांच्या निवडणुका ताकदीने व क्षमतेने लढवत गद्दारी करणाऱ्या गद्दारांना घरी बसविण्याचे आवाहन शिवसेनेच्या उत्तर महाराष्ट्र महिला आघाडीच्या संघटक शुभांगी पाटील यांनी केले आहे.
संगमनेरच्या शासकीय विश्रामगृहामध्ये शनिवारी होऊ घातलेल्या आगामी जिल्हा परिषद, पंचायत समिती, नगर परिषद, ग्रामपंचायतीसह स्थानिक स्वराज्य संस्थांच्या निवडणुकीच्या अनुषंगाने संगमनेर तालुका महिला आघाडीच्या सक्षमीकरणाअंतर्गत नियोजनासाठी शुभांगी पाटील यांच्या उपस्थितीत बैठक पार पडली. यावेळी पाटील बोलत होत्या. महिला आघाडीच्या उत्तर नगर जिल्हा संपर्क संघटक शुभदा शिंदे, महिला आघाडीच्या जिल्हा संघटक सपना मोरे, महिला आघाडीच्या उपजिल्हा संघटक आशा केदारी, जिल्हा सरचिटणीस सुरेखा गुंजाळ, तालुका संघटक शितल हासे, शहर संघटक संगीता गायकवाड आदी महिला पदाधिकारी उपस्थित होत्या.
पाटील म्हणाल्या, सत्तेच्या लोभाने अनेकांनी शिवसेना सोडली. शिवसेनेसोबत गद्दारी करणाऱ्यांना आता घरी बसविण्याची वेळ आली आहे. नगरपरिषद, पंचायत समिती, जिल्हा परिषद आदी स्थानिक स्वराज्य संस्थांच्या निवडणुकीच्या रूपाने या सर्व गद्दारांना घरी बसविण्याची संधी आपल्याला उपलब्ध होणार आहे. त्यासाठी होऊ घातलेल्या आगामी सर्वच निवडणुका शिवसेनेच्या (ठाकरे) पदाधिकारी कार्यकर्त्यांनी पूर्ण ताकदीनिशी लढवाव्यात. गद्दारांची गद्दारी समाजात जाऊन सांगतानाच मतदानाच्या रूपाने या गद्दारांना गाडण्याची संधी प्राप्त होणार असल्याचे स्पष्ट करीत उद्धव बाळासाहेब ठाकरे यांचे हात बळकट करण्याचे आवाहन केले.
शुभदा शिंदे म्हणाल्या, आगामी काळात महिलांनी सक्षम होण्याची आवश्यकता आहे. महिलांना न्याय आणि सुरक्षा केवळ उद्धव बाळासाहेब ठाकरे यांच्या शिवसेनेतच मिळू शकते. त्यामुळे येणाऱ्या निवडणुका महिलांनी पुरुषांच्या खांद्याला खांदा लावून लढाव्या व जिंकाव्यात. या माध्यमातून आपल्याला उद्धव बाळासाहेब ठाकरे यांच्या पाठीशी ठामपणे उभे राहायचे आहे.
सपना मोरे म्हणाल्या, मी दोन वेळा नगरसेविका म्हणून निवडून आले. हे सर्व जनतेच्या आशीर्वादाने साध्य झाले आहे. तुम्ही एकाच पक्षात प्रामाणिक राहिला तर जनता, मतदार देखील तुमच्या पाठीशी उभे राहतात. पद आज आहे उद्या नाही किंवा आज छोटे पद असेल तर भविष्यात मोठे पद मिळेल, परंतु आहे त्या पक्षात एकनिष्ठ राहूनच तुम्हाला मानसन्मान मिळतो.
यावेळी महिला आघाडीच्या विसपुते आणि परदेशी यांनी देखील महिलांना मार्गदर्शन केले.
संगमनेरमध्ये झालेल्या या बैठकीचे सूत्रसंचालन व नियोजन शिवसेना संगमनेर शहर प्रमुख अमर कतारी यांनी केले. याशिवाय शिवसेनेचे तालुकाप्रमुख भाऊसाहेब हासे आणि संजय फड, अकोले तालुकाप्रमुख मनोज मोरे, उपजिल्हाप्रमुख महेश नवले हे प्रमुख पदाधिकारी देखील उपस्थित होते.
