महाराष्ट्र संवाद न्यूज
संगमनेर – शिकारीच्या शोधात पहाटेच्यावेळी रस्त्याच्या कडेला झुडपामध्ये दबा धरून बसलेल्या बिबट्याने वृद्धावर हल्ला केल्याचा प्रकार शुक्रवारी सकाळी संगमनेर तालुक्यात समोर आला. बिबट्याच्या आल्यात जखमी झालेल्या वृद्धाला उपचारासाठी अहमदनगरच्या जिल्हा रुग्णालयात हलविण्यात आले आहे.
संगमनेर तालुक्यातील दाढ खुर्द गावाच्या शिवारात असलेल्या शिंगोरे वस्ती जवळ शुक्रवारी पहाटे सव्वा सहा वाजण्याच्या सुमारास ही घटना घडली. दुचाकीवरून चाललेल्या पोपट उर्फ रामा कारभारी पर्बत (वय 65 वर्ष) यांच्यावर बिबट्याने अनपेक्षित रित्या हल्ला चढविला. हल्लेखोर बिबट्याने त्यांना जवळच्या झुडपात ओढण्याचा प्रयत्न केला मात्र पर्बत यांचा आरडाओरडा ऐकून जवळच असलेल्या दोघांनी त्यांच्या मदतीसाठी येत बिबट्याला हुसकावून लावले.
ऐनवेळी उद्भवलेल्या प्रसंगात हे दोघे वृद्धाच्या मदतीला आले नसते तर मोठा बिकट प्रसंग ओढावला असता. या हल्ल्यात पर्बत जखमी झाल्याने स्थानिक नागरिकांच्या मदतीने नातेवाईकांनी पर्बत यांना दाढ बुद्रुक येथील आरोग्य केंद्रात प्राथमिक उपचारासाठी हलविले. तेथे त्यांच्यावर प्राथमिक उपचार करण्यात आले. तेथून त्यांना पुढील उपचारासाठी अहमदनगरच्या जिल्हा रुग्णालयात हलविण्यात आले.
घटनेची माहिती मिळताच वनविभागाचे अधिकारी घटनास्थळी दाखल झाले होते. गेल्या काही दिवसातील बिबट्याचा हा मानवावरील चौथा-पाचवा हल्ला आहे. नरभक्षक बिबट्याला पकडण्यात वन विभागाला अद्याप यश आलेले नाही. असे असले तरी या परिसरात बिबट्याला पकडण्यासाठी आणखी दोन पिंजरे लावले जाणार असल्याची माहिती देण्यात आली.
