महाराष्ट्र संवाद न्यूज
लोणी – राज्याचे महसूल व पशुसंवर्धन मंत्री राधाकृष्ण विखे पाटील लोणी बुद्रुक मधील पाथरे रस्त्यावर असलेल्या शेतामध्ये वनविभागाने लावलेल्या पिंजऱ्यात पाच-सहा वर्षे वयाचा नर बिबट्या शुक्रवारी रात्री जेरबंद झाला. विखे पाटील यांच्या शेतात जेरबंद झालेला हा चौथा बिबट्या असल्याचे सांगण्यात आले.
लोणी परिसरामध्ये गेल्या काही दिवसात बिबट्यांचा वावर मोठ्या प्रमाणात वाढल्याचे समोर आले आहे. या परिसरात आतापर्यंत जवळपास 15 बिबटे जेरबंद करण्यात वन विभागाला यश आले आहे. पाथरे रस्त्यावर महसूल मंत्री राधाकृष्ण विखे पाटील यांची शेती आहे.
मोठ्या लोकवस्तीच्या परिसरात असलेल्या या शेतामध्ये अनेक दिवसांपासून बिबट्यांचा वावर वाढला असल्याचे दिसून आल्याने या बिबट्यांना पकडण्यासाठी वनविभागाने मंत्री विखे यांच्या शेतात पिंजरा लावलेला होता.
शुक्रवारी मध्यरात्री या शेतात भक्ष्याच्या शोधात पाहुणचारासाठी थांबलेला बिबट्या अलगदपणे या पिंजऱ्यात अडकला. पिंजऱ्यात अडकल्यानंतर त्याने दिलेल्या जोराच्या डरकाळ्यामुळे आजूबाजूच्या लोकांना जाग आली.
मात्र मध्यरात्रीची वेळ असल्याने कोणीही शेताकडे जाण्याचे धाडस केले नाही. सकाळपर्यंत बिबट्याच्या डरकाळ्या सुरू असल्याने सकाळी नागरिकांनी पिंजऱ्याकडे धाव घेतली असता त्यात बिबट्या अडकल्याचे दिसून आले. त्यानंतर पिंजऱ्यात अडकलेला हा भला मोठा बिबट्या पाहण्यासाठी नागरिकांनी मोठी गर्दी केली होती. बिबट्या पिंजऱ्यात अडकल्याची माहिती मिळतात मंत्री विखे पाटील यांच्या पत्नी जिल्हा परिषदेच्या माजी अध्यक्ष शालिनीताई विखे पाटील यांनी देखील घटनास्थळी धाव घेतली. तसेच वनविभागाच्या अधिकाऱ्यांना या संदर्भात माहिती मिळाल्यानंतर तेही घटनास्थळी पोहोचले होते.
आत्तापर्यंत लोणी परिसरात वन खात्याने पकडलेल्या बिबट्यांमध्ये हा बिबट्या सर्वाधिक वयाचा म्हणजेच पाच-सहा वर्षाचा असल्याचे वनविभागाच्या अधिकाऱ्यांनी सांगितले. वनविभागाने पकडलेल्या बिबट्याला तेथून हलविले असले तरी या परिसरात आणखी दोन बिबट्यांनी नागरिकांना दर्शन दिल्याने भीतीचे वातावरण अद्यापही कायम आहे.
