महाराष्ट्र संवाद न्यूज
संगमनेर – ‘कीस करायचा आहे, माझ्यासोबत हॉटेलवर चल’ म्हणत विकृताने 23 वर्षीय विवाहित महिलेचा विनयभंग केल्याची घटना संगमनेर शहरात बसस्थानकावर घडली आहे.
मुळच्या मनमाड येथील व हल्ली नाशिक येथे राहत असलेल्या पीडित महिलेने दिलेल्या तक्रारीवरून संगमनेर शहर पोलीस ठाण्यात बुधवारी लोणी येथील किरण किसन आहेर याच्या विरोधात विनयभंगाचा गुन्हा दाखल करण्यात आला आहे.
चुकून हाय केल्या गेलेल्या व्हाट्सअप मेसेजचा गैरफायदा घेत दररोज हाय, हॅलो, गुड मॉर्निंग, गुड नाईट करत आरोपीने पिडितेशी संपर्क वाढवला. पीडित महिलेने देखील आरोपीकडे लोणी गावामध्ये असलेल्या कॉलेजवर नोकरी भेटेल का अशी विचारणा केली असता आरोपी किरण आहेर याने पीडित महिलेला संगमनेरमध्ये माझे डॉक्टर मित्र असून त्यांच्याकडे रुग्णालयात नोकरीला लावतो असे सांगून तिला संगमनेरच्या बस स्टँडवर बोलावून घेतले होते.
नोकरीच्या आशेने पीडित महिला बुधवारी सायंकाळी चार वाजण्याच्या सुमारास संगमनेरमध्ये आली. तेथे आरोपीसोबत तिची भेट झाली असता आरोपीने बस स्थानकावरील येवले अमृततुल्य चहाच्या दुकानासमोर या विवाहित महिलेचा विनयभंग केल्याचा प्रकार घडला.
येवले चहासमोर आरोपीने पीडित महिलेला संबंधित डॉक्टरकडे नेण्यासाठी आपल्या गाडीत बसण्यास सांगितले. परंतु पीडित महिला गाडीत बसली नाही त्यामुळे आरोपी किरण आहेर हा गाडीच्या बाहेर येऊन या महिले शेजारी उभा राहून तिच्याशी बोलू लागला. ‘तू मला खुप आवडतेस, मला तुला कीस करायचा आहे, तू माझ्याबरोबर हॉटेलवर चल, तू इतकी छान दिसते की तुला जॉब करायची गरज नाही. मी तुला पैसे देत जाईल फक्त मी जेव्हा बोलवेल तेव्हा तू संगमनेरला येत जा, किंवा मी नाशिकला येत जाईल. असे म्हणत महिलेचे आपल्या मोबाईल मध्ये फोटो काढत तिच्याशी लज्जास्पद वर्तन केले.
याचा राग आल्याने पीडित महिलेने त्याच्याकडील मोबाईल हिसकावून घेत रस्त्यावर आपटला. त्यामुळे त्यांच्यात झटापट झाली. आजूबाजूच्या नागरिकांच्या हा प्रकार लक्षात आल्याने त्यांनी आरोपीला पकडून ठेवले. महिलेने घटनेची माहिती 112 क्रमांकावर पोलिसांना दिल्यानंतर घटनास्थळी आलेल्या पोलिसांनी आरोपीला ताब्यात घेतले.
पीडित महिलेने संगमनेर शहर पोलीस ठाण्यात आरोपी किरण किसन आहेर (रा. लोणी, ता. राहाता) याच्या विरोधात दिलेल्या तक्रारीवरून विनयभंगाचा गुन्हा दाखल करण्यात आला आहे. पोलीस निरीक्षक भगवान मथुरे यांच्या मार्गदर्शनाखाली पोलीस हेडकॉन्स्टेबल पारधी पुढील तपास करत आहे.
