महाराष्ट्र संवाद न्यूज
संगमनेर – संगमनेरमधील उपक्रमशील शिक्षिका वृषाली कडलग यांना गुरुवारी (ता.27 जुलै) नवी दिल्लीच्या विज्ञान भवनामध्ये भारतरत्न डॉक्टर एपीजे अब्दुल कलाम अवॉर्डने सन्मानित करण्यात आले.
कडलग संगमनेर तालुक्यातील धांदरफळच्या देशमुख मळा जिल्हा परिषद प्राथमिक शाळेतील उपक्रमशील शिक्षिका म्हणून ओळखल्या जातात. माजी राष्ट्रपती स्व. डॉ. एपीजे अब्दुल कलाम यांच्या आठव्या पुण्यस्मरण दिनानिमित्त झालेल्या ‘भारताला जी २० चे अध्यक्षपद कसे मिळाले आणि त्याचे सुवर्ण नियम काय असतील’ या विषयावरील राष्ट्रीय कॉन्क्लेव्हमध्ये सामजिक न्याय मंत्री खा. रामदास आठवले, दिल्लीच्या महापौर शैलजा ओबेरॉय, खा. मोहम्मद इम्रान हुसेन, खा. रामनिवास गोयल, मोहम्मद झाकीर, डॉ. शमीम खान यांच्या उपस्थितीत त्यांना अवॉर्डने सन्मानित करण्यात आले.
यांचाही झाला सन्मान: या परिषदेत फाउंडेशनच्यावतीने विविध क्षेत्रात उल्लेखनीय कामगिरी करणाऱ्या सिने अभिनेता अकबर, रणजित सिंह, पंतप्रधान नरेंद्र मोदी यांचे गुरु ह.भ.प.कालिदास महाराज, दिल्लीच्या महापौर शैलजा ओबेराय यांनाही या पुरस्काराने सन्मानित करण्यात आले.
या कारणांमुळे घेतली दखल: उपक्रमशील शिक्षिका म्हणून केलेल्या शैक्षणिक कार्याचा व इनरव्हील क्लब ऑफ संगमनेरच्या माजी प्रेसिडेंट म्हणून दिलेल्या सामाजिक योगदानाचा व महिला सक्षमीकरणासाठी दिलेल्या विशेष योगदानाचा या पुरस्कारासाठी विचार करण्यात आला. उपक्रमशील शिक्षिका म्हणून शाळेच्या भौतिक व शैक्षणिक विकासासाठी लोकसहभागातून केलेल्या कार्याची ही या पुरस्कारासाठी दखल घेण्यात आलेली आहे. शाळा आयएसओ प्रमाणित करण्याबरोबरच शाळा सौर ऊर्जा प्रकाशित केली आहे. पर्यावरण संवर्धनासाठी त्यांनी नो प्लास्टिक उपक्रम राबविला आहे.
गावातील ग्रामस्थांना एकत्र आणत लोकसहभागातून शाळेचा भौतिक विकास साधण्याची किमया कडलग यांनी साधली आहे. त्याचबरोबर शैक्षणिक गुणवत्तेमध्येही शाळेने राज्यात आपला नावलौकिक मिळवला आहे प्राप्त केला आहे.
