महाराष्ट्र संवाद न्यूज
अहमदनगर – सध्या राज्यात सर्वत्र महसूल सप्ताह सुरू आहे. या महसूल सप्ताहात सोमवारी जिल्हाधिकारी सिद्धाराम सालीमठ यांच्या उपस्थितीत महसूल कर्मचाऱ्यांसाठी रक्तदान, आरोग्य तपासणी शिबिराचे आयोजन करण्यात आले होते. या शिबिरादरम्यान नेत्रदान, अवयव दाना बाबत जागृती करण्यात येऊन कर्मचाऱ्यांकडून संमती पत्रे भरून घेण्यात आली.
महसूल सप्ताह : लोकाभिमुख कामांचा करुया निपटारा चला करू ‘महसूल सप्ताह’ साजरा हे ब्रीदवाक्य घेऊन जिल्ह्यात महसूल सप्ताह विविध कार्यक्रमांच्या माध्यमातून साजरा करण्यात येत आहे.
या उपक्रमाचे करण्यात आले आयोजन: या सप्ताहानिमित्त जिल्हाधिकारी सिद्धाराम सालीमठ यांच्या उपस्थितीत जिल्हाधिकारी कार्यालयाच्या परिसरात सोमवारी महसूल अधिकारी, कर्मचाऱ्यांसाठी रक्तदान,आरोग्य तपासणी शिबीर तसेच नेत्रदान व अवयव दान बाबत संमती पत्र प्राप्त करून घेण्याचा कार्यक्रम झाला.
हे होते उपस्थित: यावेळी अपर जिल्हाधिकारी सुहास मापारी, उपजिल्हाधिकारी (रोहयो) गंगाराम तळपाडे, जिल्हा शल्य चिकित्सक संजय घोगरे यांच्यासह महसूल विभागातील अधिकारी, कर्मचाऱ्यांची उपस्थिती होती.
सामाजिक जाणीव: रक्तदान हे सर्वश्रेष्ठ दान समजल्या जाते. समाजाचे आपणही काही देणे लागतो, ही भावना अंगी रुजवून अधिकारी, कर्मचाऱ्यांनी स्वेच्छेने रक्तदान करण्याबरोबरच मरणोत्तर आपले अवयव दान करून समाजातील गरजूंना नवीन आयुष्य मिळावे, यादृष्टीने अधिकाधिक अधिकारी, कर्मचाऱ्यांनी अवयव दानाचा संकल्प करून संमतीपत्र देण्याचे आवाहनही यावेळी करण्यात आले.
यावेळी महसूल विभागातील अधिकारी, कर्मचाऱ्यांची आरोग्य तपासणी करण्यात आली. कार्यक्रमास महसूल विभागातील अधिकारी, कर्मचारी, महिला कर्मचाऱ्यांची मोठ्या संख्येने उपस्थिती होती.
