महाराष्ट्र संवाद न्यूज
जालना – राजकारण्यांच्या विनाकारण नादी लागू नका. सरकारनं तुम्हाला वेडं केलं आणि रस्त्यावर आणलं. या लोकांना फक्त तुमची मतं पाहिजेत. तुमच्यासाठी काही करायचं नाही. आंदोलकांवर लाठीचार्ज करणाऱ्या नेत्यांना मराठवाड्यात येऊ देऊ नका, अशा शब्दात मनसे अध्यक्ष राज ठाकरे यांनी सरकारवर हल्ला चढवत आंदोलकांना पाठिंबा दिला यामुळे मराठा आरक्षणाचा मुद्दा आणखी पेटण्याची चिन्हे निर्माण झाली आहे.
का आले होते: जालन्यामध्ये एक सप्टेंबरला मराठा आंदोलकांवर पोलिसांनी लाठीचार्ज केला यामध्ये आंदोलकांसह आणि पोलीसही जखमी झाले या पार्श्वभूमीवर महाराष्ट्र नवनिर्माण सेनेचे अध्यक्ष राज ठाकरे यांनी सोमवारी (4 सप्टेंबर) जालना येथे मराठा आंदोलकांची भेट घेतली.
राजकारण पेटलं: जालन्यातील घटनेनंतर मराठा आरक्षणाचा मुद्दा तीव्रपणे चर्चेत आला आहे. या प्रश्नावरून राजकारण ही पेटलं आहे. जालन्यामध्ये आंदोलकांना भेटण्यासाठी राजकीय नेत्यांची रीघ लागली.
नेत्यांची रीघ: शनिवारी (2 सप्टेंबर) शरद पवार यांनी लाठीचार्ज दरम्यान जखमी झालेल्या आंदोलकांची भेट घेतली. घडलेला हा प्रकार अत्यंत गंभीर असून, पोलिसांना लाठीचार्जची ऑर्डर मुंबईवरून देण्यात आली होती, असा आरोप शरद पवार यांनी केला. त्यापाठोपाठ उद्धव ठाकरे आणि संजय राऊत यांनी मराठा आंदोलकांची जालना येथे जाऊन भेट घेतली होती. लाठीचार्ज करण्यासाठी मंत्रालयातून आलेला तो अदृश्य फोन कॉल कोणाचा होता? असा सवाल संजय राऊत यांनी राज्य सरकारला विचारला होता. तसेच छत्रपती संभाजीराजे आणि खासदार उदयनराजे भोसले यांनीही जालना येथे येऊन मराठा आंदोलकांची भेट घेतली. सरकारचे संकटमोचक असलेले गिरीश महाजन यांनी देखील आंदोलकांचे समजूत काढण्याचा प्रयत्न केला मात्र त्यांना अपयश आले.
ठाकरेंचा ताफा अडविला: दरम्यान ठाकरे जालन्याकडे येत असताना रस्त्यात मराठा आंदोलकांनी त्यांच्या वाहनांचा ताफा आडवत ठाकरे यांच्यासमोर जोरदार घोषणाबाजी केली. आंदोलकांनी ठाकरे यांना यावेळी निवेदन दिले. ठाकरे यांनी यावेळी बोलताना राज्य सरकारवर टीका केली.
ठाकरेंनी यापूर्वीच केली होती भूमिका स्पष्ट: मनसे अध्यक्ष राज ठाकरे यांनी यापूर्वीच मराठा आंदोलनासंदर्भात एका ट्विटद्वारे आपली भूमिका स्पष्ट केली होती. त्यानंतर रविवारी मराठा आंदोलनाला पाठिंबा जाहीर केला. ठाकरे यांनी फोनवरून आंदोलकांशी संवाद साधला. आमचा या आंदोलनाला पाठिंबा आहे, असं राज ठाकरे यावेळी म्हणाले. मनसे नेते बाळा नांदगावकर यांनीही रविवारी आंदोलकांची भेट घेऊन त्यांना पाठिंबा जाहीर केला. त्यानंतर आज राज ठाकरे यांनी जालन्यात मराठा आंदोलकांची भेट घेतली.
जालना येथील 'मराठा आरक्षण' आंदोलकांशी चर्चा केल्यानंतर उपस्थितांशी संवाद साधला. #मराठाआरक्षण #MarathaReservation #JalnaMarathaProtest pic.twitter.com/42ipPogHsL
— Raj Thackeray (@RajThackeray) September 4, 2023
