महाराष्ट्र संवाद न्यूज
संगमनेर – अन्य सर्व मार्ग बंद झाल्याने गणेश विसर्जनासाठी प्रवरा नदीवर जाण्यासाठी केवळ अकोले रोड कडून मालपाणी हेल्थ क्लब मार्गे गंगामाई घाटाकडे जाणारा एकमेव रस्ता सुरू असल्याने गणेश भक्तांचे मोठे हाल झाल्याचे बघावयास मिळाले.
मुख्य मानाच्या गणेश विसर्जन मार्गावरील प्रवरा नदीकडे जाणाऱ्या परदेशपुऱ्यातील मठाजवळील रस्ता रस्त्यावर इतर गणेश भक्तांना परवानगी नसल्याने बंद असतो. त्यामुळे स्वामी समर्थ मंदिराजवळील पुलावरून प्रवरा नदीवरील गंगामाई घाटाकडे जाणारा, अकोले रोड मार्गे मालपाणी हेल्थ क्लबच्या बाजूने गंगामाई घाटाकडे जाणारा रस्ता गणेश विसर्जनाकरिता खुला असतो. या दोन मार्गाने विसर्जन केले जाते. मात्र गेल्या वर्षभरापासून स्वामी समर्थ मंदिर ते साई मंदिरा दरम्यानचा पूल खचल्यामुळे वाहतुकीसाठी बंद आहे. त्याला तात्पुरता पर्याय रस्ता म्हणून साईनगर जवळील म्हाळुंगी नदीवर तात्पुरत्या स्वरूपात पूल बांधण्यात आला मात्र गुरुवारी म्हाळुंगी नदीला पाणी आल्याने हा पूल देखील वाहतुकीसाठी तातडीने बंद करण्यात आला. त्यामुळे अकोले रोड कडून प्रवरा नदीकडे जाणारा एकमेव रस्ता विसर्जनासाठी आज खुला होता.
या दूरच्या मार्गाने आज संगमनेरकर गणेश भक्तांना बाप्पाच्या विसर्जनाची मोठी कसरत करावी लागली. संगमनेरकर नागरिकांनी शहरातील गणेश मंडळे आपल्या बाप्पाच्या विसर्जनासाठी स्वामी समर्थ मंदिरापाशी आल्यानंतर त्यांना मोठा वळसा घालून म्हाळुंगी नदीच्या कडेने राज पॅलेस कडून अकोले रोडला जावे लागत होते.
मुख्याधिकारी राहुल वाघ यांनी केले हे आवाहन…
म्हाळुंगी नदीला भोजापुर धरणातून पाण्याचा विसर्ग सुरू झाल्याने सुरक्षिततेच्या दृष्टीने साईनगर कडे जाणारा तात्पुरता पूल बंद करण्यात येत आहे. त्यामुळे नागरिकांनी गंगामाई घाटाकडे जाण्यासाठी पर्यायी रस्त्याचा अवलंब करावा. तसेच श्री गणेश मूर्ती व निर्मल्य संकलनासाठी शहरातील विविध भागात संकलन केंद्र सुरू आहे गणेश भक्तांनी याची नोंद घेऊन नगर परिषदेस सहकार्य करण्याचे आवाहन संगमनेर नगरपालिकेचे मुख्याधिकारी तथा प्रशासक राहुल वाघ यांनी केले आहे.
