महाराष्ट्र संवाद न्यूज
संगमनेर : दूधगंगा नागरी सहकारी पतसंस्था अपहार प्रकरणी गुन्हा दाखल होऊन तब्बल चार महिन्यांचा कालावधी उलटण्याच्या मार्गावर आहे. मात्र अद्यापही या अपहार प्रकरणातील मुख्य मुख्य आरोपी भाऊसाहेब कुटे कुठे दडून बसला याचा शोध लागत नसताना त्याचे कुटुंब मात्र अटकपूर्व जामीनासाठी हायकोर्टापर्यंत पोहोचले आहे.
भाऊसाहेब कुटे याच्यासह त्याच्या कुटुंबियांना संगमनेरच्या जिल्हा अतिरिक्त सत्र न्यायालयाने अटकपूर्व जामीन नाकारल्यानंतर आता त्याचे कुटुंब औरंगाबाद हायकोर्टात अटकपूर्व जामीनासाठी पोहोचले आहे. गेल्या आठवड्यात शकुंतला भाऊसाहेब कुटे, विमल भाऊसाहेब कुटे, संदीप भाऊसाहेब कुटे, दादासाहेब भाऊसाहेब कुटे, अमोल भाऊसाहेब कुटे व सोनाली दादासाहेब कुटे यांचा यात समावेश आहे. यांच्या जामीन अर्जावर काय निर्णय होतो यानंतर मुख्य आरोपी आपल्या जामीन अर्जाबाबत निर्णय घेण्याची शक्यता व्यक्त होत आहे.
दूधगंगा नागरी सहकारी पतसंस्थेतील सुमारे 81 कोटी रुपयांच्या अपहार प्रकरणी जिल्हा विशेष लेखापरीक्षक राजेंद्र निकम यांच्या फिर्यादीवरून संगमनेर शहर पोलीस ठाण्यात तब्बल 21 जणांविरोधात गुन्हा दाखल करण्यात आला आहे. यात 17 जणांचा मुख्य आरोपींमध्ये समावेश असून सहा जणांनी त्यांना सहाय्य केले असल्याचा ठपका ठेवण्यात आला आहे.
सतरा मुख्य आरोपींमध्ये पतसंस्थेचा चेअरमन भाऊसाहेब दामोदर कुटे याच्यासह व्यवस्थापक भाऊसाहेब विठ्ठल गुंजाळ, चीफ अकाउंटंट भाऊसाहेब संतू गायकवाड, चेतन नागराज बाबा कपाटे उर्फ सुदर्शन महाराज (छत्रपती संभाजीनगर) यांच्यासह दादासाहेब भाऊसाहेब कुटे, संदीप भाऊसाहेब कुटे, अमोल भाऊसाहेब कुटे, विमल भाऊसाहेब कुटे, शकुंतला भाऊसाहेब कुटे, अमोल कृषी सेवा केंद्र प्रोप्रायटर सोनाली दादासाहेब कुटे, अमोल ट्रेडिंग कंपनी प्रोप्रायटर दादासाहेब भाऊसाहेब कुटे, श्री डेव्हलपर्स संदीप भाऊसाहेब कुटे (सर्व संगमनेर), यांच्यासह कृष्णराव श्रीपतराव कदम, श्रीमती प्रमिला कृष्णराव कदम, अजित कृष्णराव कदम, सुजित कृष्णराव कदम (सर्व रा. देवळाली प्रवरा, ता. राहुरी) व संदीप दगडू जरे (रा. अहमदनगर) यांचा प्रमुख 17 आरोपींमध्ये समावेश आहे.
तर लहानु गणपत कुटे, उत्तम शंकर लांडगे, उल्हास रावसाहेब थोरात, सोमनाथ कारभारी सातपुते, अरुण के. बुरड सनदी लेखापाल (नाशिक) अमोल क्षीरसागर सनदी लेखापाल (नाशिक) यांच्यावर वरील आरोपींना सहाय्य केल्याचा ठपका ठेवण्यात आला आहे.
या गुन्ह्याचा तपास नगरच्या आर्थिक गुन्हे शाखेकडे सोपविण्यात आला असून तपास वर्ग होण्यापूर्वी संगमनेर शहर पोलिसांनी मुख्य आरोपींपैकी व्यवस्थापक भाऊसाहेब विठ्ठल गुंजाळ याच्यासह सहाय्य करणाऱ्या चार आरोपींना अटक केली होती. तर कॅशियर उत्तम लांडगे हा आर्थिक गुन्हे शाखेसमोर हजर झाला होता. मुख्य आरोपी भाऊसाहेब कुटेसह त्याच्या कुटुंबीयांचा जामीन अर्ज जिल्हा व सत्र न्यायालयाने फेटाळला असून अन्य काही आरोपींचा जामीन मंजूर केला आहे.
अटकपूर्व जामीन मिळविण्यासाठी आरोपी भाऊसाहेब कुटेसह त्याचे कुटुंबीय औरंगाबाद हायकोर्टात जाण्याची चिन्हे होती. मात्र कुटे याच्या कुटुंबीयांनी अटकपूर्व जामीन मिळविण्यासाठी औरंगाबाद हायकोर्टात जामीन अर्ज दाखल केला आहे. न्यायमूर्ती आर. एम. जोशी यांच्यासमोर या अर्जाचे सुनावणी होत आहे. तर कुटे याचा अर्ज अद्यापही न्यायालयात दाखल झाला नसल्याचे दिसते.
दरम्यान संगमनेरच्या जिल्हा व अतिरिक्त सत्र न्यायालयात कृष्णराव श्रीपतराव कदम व श्रीमती प्रमिला कृष्णराव कदम यांनी अटकपूर्व जामीन अर्ज दाखल केला असून या अर्जावर अद्याप निर्णय बाकी आहे. तर हायकोर्टात कुटे कुटुंबीयांच्या जामीन अर्जासंदर्भात कुटुंबीयांनी कर्ज भरले असल्याचे न्यायालयाला सांगितले. त्यामुळे याची पडताळणी केल्यानंतर यावर न्यायालयाचा निर्णय समोर येणार आहे.
