महाराष्ट्र संवाद न्यूज
संगमनेर:
अवैध वाळू तस्करी रोखण्यासाठी राज्याच्या महसूल मंत्र्यांनी नवे वाळू धोरण आणले असले तरी या वाळू धोरणाला सत्ताधारी पक्षाच्याच कार्यकर्त्यांकडून तिलांजली देण्याचे काम सुरू आहे. संगमनेर तालुक्यातील शेडगावमध्ये सत्ताधारी पक्षाच्या कार्यकर्त्याची वाळू तस्करी गावकऱ्यांनी समोर आणली आहे.
नदीपात्रातून मोठ्या प्रमाणात अवैध गौण खनिज लूट सुरू आहे. या संदर्भात गावकऱ्यांनी एकत्रित येत ठेकेदार संदीप भाऊसाहेब घुगे (रा. मालुंजे) यांच्याविरुद्ध तक्रार केली असून या वाळू उत्खननाचा पंचनामादेखील करण्यात आला आहे.
मंडल अधिकारी व तलाठी यांच्या समक्ष वाळू उपशाचा पंचनामा केला आहे. यात २१ नोव्हेंबर २०२३ रोजी सकाळी अकरा वाजण्याच्या सुमारास संदीप भाऊसाहेब घुगे यांनी गावातील लोकांना हाताशी धरून नदीपात्रातून बेकायदेशीररित्या स्वतःच्या मालकीच्या जेसीबी व डंपरच्या माध्यमातून अंदाजे दीडशे ते दोनशे डंपर वाळू उपसा केला.
यामुळे नदीपात्रात आठ मोठाले खड्डे पडले असून त्यापैकी पाच खड्डे बुजविले गेले आहेत. झालेल्या या अवैध वाळू उत्खननावर कोणाचेही नियंत्रण नाही. रात्रीच्या वेळेस व दिवाळीच्या सुट्ट्यांमध्ये हा वाळू उपसा झाला असल्याचे म्हटले आहे.
पंचनाम्यावेळी शेडगाव येथील तलाठी मंडळ अधिकारी यांच्याबरोबर सरपंच राजेंद्र चंद्रभान बर्डे, दत्तात्रय नागरे, राजेंद्र सोनवणे, नारायण दादा नागरे, शितल उगलमुगले, जनजीवन उगलमुगले, दिलीप सांगळे, कैलास आंधळे, राजेंद्र आंधळे आदींसह विविध नागरिक व महिला मोठ्या संख्येने उपस्थित होत्या.
वाळू उत्खनन सत्ताधारी मंत्र्यांच्या आशीर्वादाने धाक दाखवून लोकांना दमदाटी करून मोठ्या प्रमाणात वाळू तस्करीच्या माध्यमातून पैसे कमविले जात वाळू तस्करी आणि दमदाटीची परिसरात भीती असल्याचे गावकऱ्यांनी म्हटले असून उपोषणाचा इशारा देण्यात आला आहे.
