अमृतवाहिनी सहकारी बँकेची ऑनलाइन प्रणाली कौतुकास्पद
महाराष्ट्र संवाद न्यूज
बँकिंग हा विषय आज प्रत्येकाच्या जीवनात महत्त्वाचा झाला आहे. ग्रामीण भागातील नागरी व सहकारी बँकांनी सर्वसामान्य माणसाला मोठा आर्थिक आधार दिला. आता बदलत्या काळात नवीन तंत्रज्ञान आणि ऑनलाईन प्रणालीचा वापर अनिवार्य ठरला असून या क्षेत्रात अमृतवाहिनी सहकारी बँकेने केलेले काम कौतुकास्पद ठरल्याचे प्रतिपादन नाशिक पदवीधर मतदार संघाचे माजी आमदार डॉ. सुधीर तांबे यांनी केले.
अहमदनगर जिल्हा नागरी सहकारी बँक असोसिएशन आणि सहकार महर्षी भाऊसाहेब थोरात अमृतवाहिनी सहकारी बँकेच्यावतीने संगमनेरमध्ये ‘असोसिएशन आपल्या दारी’ या कार्यक्रमाचे आयोजन करण्यात आले होते. यावेळी डॉ. तांबे बोलत होते. प्रशिक्षक लेखापरीक्षक अक्षय भाटे, उद्योजक राजेश मालपाणी, असोसिएशनचे अध्यक्ष गिरीश घैसास, अमृतवाहिनी बँकेचे अध्यक्ष सुधाकर जोशी आदींसह जिल्ह्यातून आलेले सहकारी बँकांचे अध्यक्ष उपाध्यक्ष संचालक उपस्थित होते.
तांबे म्हणाले, ज्येष्ठ स्वातंत्र्य सेनानी सहकार महर्षी भाऊसाहेब थोरात यांच्या आदर्श तत्वांवर संगमनेरचा सहकार कामकाज करत आहे. काँग्रेस नेते आमदार बाळासाहेब थोरात यांच्या मार्गदर्शनाखाली संगमनेरचा ‘सहकार पॅटर्न’ सहकारी संस्थांसाठी दिशादर्शक ठरला आहे. अमृतवाहिनी बँकेने सर्वसामान्यांना नेहमीच मदत केली असून या संस्थेत होत असलेला ऑनलाइन प्रणालीचा वापर कौतुकास्पद आहे.
रिझर्व्ह बँकेचे नियम दिवसेंदिवस कठीण होत चालले आहेत. या पार्श्वभूमीवर इंटरनल ऑडिट अत्यंत महत्त्वाचे ठरते. या अनुषंगाने घेतलेले चर्चासत्र सर्व बँकांसाठी नक्कीच उपयोगी ठरेल, असा विश्वास तांबे यांनी यावेळी व्यक्त केला.
प्रशिक्षक भाटे म्हणाले, बँकिंग हा विषय दिवसेंदिवस अवघड होत चालला आहे मात्र नवीन तंत्रज्ञानाच्या सहाय्याने तो ग्राहकांना सोप्या भाषेत समजावून सांगणे गरजेचे आहे. बँकांच्या ऑडिट प्रमाणे प्रत्येक व्यक्तीने स्वतःच्या आर्थिक स्थितीचे ऑडिट केल्यास त्याच्या जीवनात समृद्धी निर्माण होईल.
राजेश मालपाणी गिरीश घैसास यांचीही यावेळी भाषणे झाली. कार्यक्रमाचे प्रास्ताविक सुधाकर जोशी यांनी, अंबादास वाणी यांनी सूत्रसंचालन केले. श्रीकांत गिरी यांनी आभार मानले.
