महाराष्ट्र संवाद न्यूज
मंत्री दादा भुसे यांनी दाखल केलेल्या मानहानी खटल्याच्या सुनावणी प्रकरणी उद्धव बाळासाहेब ठाकरे गटाचे शिवसेना नेते संजय राऊत शनिवारी (२ डिसेंबर) मालेगाव न्यायालयात उपस्थित झाले. त्यांनी दाखल केलेल्या जामीन अर्जावर सुनावणी घेतल्यानंतर न्यायालयाने राऊत यांचा जामीन अर्ज मंजूर केला.
आता या खटल्याची सुनावणी ३ फेब्रुवारीला होणार आहे. गिरणा सहकारी साखर कारखाना प्रकरणी बदनामी केल्याच्या कारणावरून मंत्री दादा भुसे यांनी मालेगाव न्यायालयात खासदार संजय राऊत यांच्याविरुद्ध मानहानीचा दावा दाखल केला आहे.
भुसे यांनी दाखल केलेल्या या दहाव्याच्या सुनावणीत खासदार राऊत आत्तापर्यंत दोनदा न्यायालयात गैरहजर राहिले होते. त्यामुळे न्यायालयाने त्यांना वॉरंट काढले होते. राऊत शनिवारी न्यायालयात हजर झाल्यानंतर त्यांच्या जामीन अर्जावर सुनावणी झाली. या सुनावणी वेळी न्यायालयाच्या आवारात मोठा पोलीस बंदोबस्त तैनात करण्यात आल्याने न्यायालयाला पोलीस छावणीचे स्वरूप आले होते.
संविधानाने मला चोराला चोर अन्…
सुनावणीनंतर खासदार राऊत यांनी संविधानाने मला चोराला चोर म्हणण्याचा अधिकार दिला असे सांगत माध्यमांशी बोलताना मंत्री दादा भुसे यांच्यावर हल्लाबोल केला. गिरणा सहकारी साखर कारखाना बचावच्या नावाखाली दादा भुसेनी शेतकऱ्यांकडून १७८ कोटी रुपये गोळा केले आहेत. हे पैसे शेतकऱ्यांच्या असून त्याच्या पावत्याही आहेत. या पैशाचा हिशोब मागितला तर आम्ही गुन्हेगार झालो का? असे राऊत म्हणाले.
संविधानाने भ्रष्टाचाराविरोधात लढण्याचा अधिकार दिला. संविधान, नियम मलाही माहिती आहेत. खटला दाखल केल्याने मी न्यायालयात आलो. आम्ही काय घाबरतो का? काहीजण नोटीस आल्यावर दुसऱ्या पक्षात पळून गेले. मालेगावचा लढवय्या योद्धा अद्वय हिरे तुरुंगात आहे. अद्वय हिरेच आमदार होतील. असा विश्वास व्यक्त करत जोपर्यंत हे जेलमध्ये आहे तोपर्यंत मी मालेगावमध्ये येणारच. सरकारी सुधाचा बळी म्हणून त्यांना जेलमध्ये टाकले आहे. आज पोलीस तुमच्या आहे उद्या ते आमचे असतील. चोराला चोर म्हटल्याबद्दल आमच्यावर खटला दाखल झाला तुम्ही २०२४ पर्यंत थांबा असे सांगत राहू त्यांनी भुसे यांना आव्हान दिले.
