महाराष्ट्र संवाद न्यूज – दि. ६ डिसेंबर
संगमनेर मध्ये छत्रपती शिवाजी महाराजांच्या अश्वारूढ पुतळ्याबरोबरच भारतरत्न डॉ. बाबासाहेब आंबेडकर यांचे पूर्णाकृती स्मारक उभारले जाईल अशी घोषणा जिल्ह्याचे पालकमंत्री तथा राज्याचे महसूल, दुग्धविकास मंत्री राधाकृष्ण विखे पाटील यांनी केली.
भारतरत्न डॉ. बाबासाहेब आंबेडकर यांच्या महापरिनिर्वाण दिनी संगमनेर येथे डॉ. आंबेडकर प्रतिष्ठानने आयोजित केलेल्या अभिवादन सभेत महसूलमंत्री राधाकृष्ण विखे पाटील यांनी आज भेट दिली. या भेटीत त्यांनी संगमनेरात छत्रपती शिवाजी महाराज यांचा अश्वारूढ पुतळा आणि भारतरत्न डॉ. बाबासाहेब आंबेडकर यांचे पूर्णाकृती स्मारक उभारले जाईल, अशी घोषणा केली. 
मागील महिन्यात विखे पाटील यांनी छत्रपती शिवाजी महाराज यांचा अश्वारूढ पुतळा संगमनेरात उभारला जाईल, अशी घोषणा केली होती. या घोषणेचे संगमनेर तालुक्यातील जनतेने स्वागत केले. मात्र बहुजन पालक छत्रपती शिवरायांसोबत बहुजन उद्धारक डॉ. बाबासाहेब आंबेडकरांचा पूर्णाकृती पुतळा संगमनेरात झाला पाहिजे, अशी मागणी डॉ. आंबेडकर प्रतिष्ठानचे कार्यकारी सदस्य प्रा. शशिकांत माघाडे, पत्रकार गौतम गायकवाड, विधिज्ञ अमित सोनवणे यांनी केली होती.
माजी महसूल मंत्री आमदार बाळासाहेब थोरात यांची भेट घेऊन या प्रश्नात लक्ष घालण्याची विनंती केली. थोरात यांनी याबाबत सकारात्मक भूमिका दर्शविली होती. यामुळे पालकमंत्र्यांच्या भूमिकेकडे लक्ष लागले होते. आगामी लोकसभा आणि विधानसभा निवडणुकीच्या पार्श्वभूमीवर सत्ताधारी पक्ष आणि विरोधक यांच्यात संगमनेरातील पूर्णाकृती स्मारके हा विषय राजकारणाच्या केंद्रस्थानी येऊ शकतो. या पार्श्वभूमीवर पालकमंत्री विखे यांनी तातडीने बुधवारी संगमनेरला येत डॉ. बाबासाहेब आंबेडकर प्रतिष्ठानच्या पदाधिकाऱ्यांची भेट घेतली.
प्रतिष्ठानच्या वतीने कुसुमताई माघाडे आणि गौतम गायकवाड यांनी पूर्णाकृती स्मारका संदर्भात पालकमंत्र्यांना लेखी निवेदन दिले आणि आपली भूमिका मांडली. दोन्ही महापुरुषांच्या स्मारकांसंदर्भात आपण सकारात्मक असून संगमनेर शहराच्या वैभवात भर घालणारे यथोचित स्मारक शासन उभारेल, अशी घोषणा यावेळी विखे पाटील यांनी केली. याच वेळी उपस्थित शासकीय अधिकाऱ्यांना स्मारकासाठी संगमनेरात जागा शोधण्याचे आदेश दिले. यामुळे संगमनेरातील बहुजन आणि आंबेडकर चळवळीतील कार्यकर्त्यांनी आनंद व्यक्त केला असून पालकमंत्र्यांच्या घोषणेचे स्वागत केले आहे.
यावेळी डॉ. आंबेडकर प्रतिष्ठानचे सचिव अण्णासाहेब अडांगळे, के. एस. गायकवाड, ए. पी. बनसोडे, विनय घोसाळे, विलासराव दारोळे, ऍड. अमित सोनवणे, असिफ शेख, विनोद गायकवाड व इतर पदाधिकारी कार्यकर्ते उपस्थित होते.
