महाराष्ट्र संवाद न्यूज
संगमनेर – दि. १० डिसेंबर
नेहरू गार्डनमध्ये लहान मुलांना खेळविण्यासाठी असलेली चाचा नेहरू एक्सप्रेस रेल्वे रुळावरून घसरल्याने झालेल्या अपघातात एक सात वर्षाचा बालक गंभीर जखमी झाला. पुढील उपचारासाठी त्याला लोणीच्या प्रवरा रुग्णालयात हलविण्यात आले असल्याची माहिती समोर येत आहे.
संगमनेर नगर परिषदेच्या नेहरू गार्डनमध्ये ही घटना घडली. विराज मारुती शिंदे (वय ७ वर्ष, रा. संजय गांधी नगर, संगमनेर) असे अपघातात जखमी झालेल्या बालकाचे नाव आहे.
गार्डनमध्ये लहान मुलांसाठी एक चाचा नेहरू एक्सप्रेस रेल्वे आहे. गार्डनमध्ये येणारी लहान बालके या एक्सप्रेस रेल्वेतून सफरीचा आनंद घेत असतात. सायंकाळी सहा वाजता नियमितपणे लहान बालकांना खेळविण्यासाठी ही रेल्वे गाडी बालकांना घेऊन चक्कर मारत असताना रुळावरून घसरली. रेल्वे पुढे जाताना असलेल्या कंपाऊंडला घासून जाऊ लागल्याने या बाजूने बालक यामध्ये सापडला आणि गंभीर जखमी झाला मोठ्या प्रमाणात खर्च केल्याने त्याच्या हाताला आणि डोक्याला मार लागल्याची माहिती समोर येत आहे.
जखमी झालेल्या बालकाला उपचारासाठी लोणी येथे हलविण्यात आले आहे. दरम्यान या अपघाताला कारणीभूत असलेल्या रेल्वे चालक व पालिका प्रशासनाला दोषी धरून त्यांच्यावर गुन्हा दाखल करण्याची मागणी होत आहे.
दरम्यान अपघातात जखमी बालकाचा सांभाळ त्याची आजी करत असून घरची परिस्थिती अत्यंत हलाखीचे असल्याने त्याच्यावर उपचार करणे देखील कठीण बनले आहे.
