महाराष्ट्र संवाद न्यूज
संगमनेर (दि. १५ डिसेंबर) -राज्यातील प्रतिष्ठेची व नावाजलेली, क्रिकेट प्रेमींना उत्सुकता लागून असलेली सहकार महर्षी चषक लेदर बॉल क्रिकेट स्पर्धा नववर्षाच्या पहिल्याच दिवशी १ जानेवारीपासून सुरू होत असल्याची माहिती नाशिक पदवीधर मतदार संघाचे युवा आमदार सत्यजीत तांबे यांनी दिली आहे.
स्वातंत्र्य सेनानी सहकार महर्षी भाऊसाहेब थोरात यांच्या जन्मशताब्दी वर्षानिमित्त जयहिंद लोक चळवळ आणि क्रिकेट असोसिएशन ऑफ संगमनेर यांच्यावतीने या स्पर्धांचे आयोजन केले जाते. सहकारमहर्षी भाऊसाहेब थोरात क्रीडा संकुलात १ ते १७ जानेवारी दरम्यान या स्पर्धा पार पडतील. यंदाचे वर्ष भाऊसाहेब थोरात यांच्या जन्मशताब्दी वर्ष असल्याने या स्पर्धेला विशेष महत्त्व प्राप्त झाले आहे. राज्यभरातील निवडक ३२ संघांना या स्पर्धेत प्रवेश दिला जाणार असून सहभागासाठी २१ डिसेंबरपर्यंत संधी आहे.
तांबे म्हणाले, यंदाचे स्पर्धेचे हे पंचविसावे वर्ष आहे. उत्तम दर्जाच्या संघाचा सहभाग, आंतरराष्ट्रीय दर्जाचे नियोजन, आयपीएल व राज्य पातळीवरील क्रिकेटपटूंचा सहभाग, प्रचंड उत्साही प्रेक्षक ही या स्पर्धेची ठळक वैशिष्ट्ये आहेत. थोरात यांच्या जन्मशताब्दी वर्षानिमित्त राज्यात व तालुक्यामध्ये विविध उपक्रमांचे आयोजन करण्यात आले आहे. संगमनेरच्या थोरात क्रीडा संकुलात राज्यस्तरीय सहकार महर्षी टी २० क्रिकेट स्पर्धा होत आहे.
स्पर्धेचे उद्घाटन काँग्रेसचे विधिमंडळ पक्षनेते कथा माजी महसूल मंत्री आमदार बाळासाहेब थोरात, आमदार सत्यजित तांबे, माजी आमदार डॉ. सुधीर तांबे, माजी नगराध्यक्ष दुर्गाताई तांबे यांच्यासह विविध मान्यवरांच्या उपस्थितीत होणार आहे. संगमनेरात पार पडलेल्या या सामन्यांसाठी आतापर्यंत बीसीसीआयचे उपाध्यक्ष खासदार राजू शुक्ला महाराष्ट्र क्रिकेट असोसिएशनचे अध्यक्ष अजय शिर्के, सिने अभिनेत्री महिमा चौधरी, अमृता खानविलकर, प्रणव धनवडे आदीसह दिग्गजांची उपस्थिती लाभली आहे. यावेळीदेखील सिने कलावंतांसह दिग्गज क्रिकेटपटूंची उपस्थिती लाभणार आहे.
भारतीय क्रिकेट संघातील सलील अंकोला, अजित आगरकर, झहीर खान, अजिंक्य रहाणे यांच्यासह अनेक रणजी, आयपीएल खेळाडूंनी आपला खेळ संगमनेरकरांना दाखविला आहे. स्पर्धेतील प्रथम विजेत्या संघास २,०१,००० रुपये, उपविजेता संघास १,३१,००० रुपये, तृतीय क्रमांक ७१,००० रुपये, चौथ्या विजेत्या संघास ३१,००० हजार रुपयांच्या पारितोषिकांसह अनेक वैयक्तिक बक्षिसांचा समावेश आहे.
