महाराष्ट्र संवाद न्यूज
अहमदनगर : गावातील अवैध दारू विक्री ग्रामपंचायतीने बंद करावी, या मागणीसाठी महिला आणि ग्रामस्थांनी उपोषण सुरू करताच ग्रामपंचायतने तात्काळ अवैध दारू विक्रेत्याची नळजोडणी तोडत त्याचा पाणीपुरवठाच बंद केला. याशिवाय त्याने अवैध दारू विक्री न थांबवल्यास ग्रामपंचायतीने त्याच्या विरोधात तीव्र कारवाई करण्याचा मानस व्यक्त केल्यानंतर उपोषण मागे घेण्यात आले.
संगमनेर तालुक्यातील सावरगाव घुले या गावांमध्ये सुरू असलेली अवैध दारू विक्री बंद करावी, यासाठी महिलांनी दारू विक्रेत्याच्या घरावर मोर्चा काढला. मात्र याचा अवैध दारू विक्रेत्यावर कोणताही परिणाम झाला नाही त्यामुळे अखेरीस महिला आणि ग्रामस्थांनी ग्रामपंचायतीने दारूबंदी करण्याच्या मागणीसाठी शनिवारी आमरण उपोषणच सुरू केले होते.
त्यामुळे उपसरपंच नामदेव घुले, ग्रामसेवक प्रमोद जाधव यांनी उपोषणार्थी महिला, ग्रामस्थांची समजूत काढली. यावेळी महिला आणि ग्रामस्थांनी आपला संताप व्यक्त केला. गावात सुरू असलेली ही अवैध दारू विक्री बंद करावी यासाठी ग्रामपंचायतच्यावतीने वारंवार संबंधिताला नोटीसा देण्यात आल्या होत्या. तसेच राज्य उत्पादन शुल्क विभागानेही कारवाई करून देखीलही दारू विक्री सुरूच होती. त्यामुळे ग्रामपंचायतनेच कठोर निर्णय घेत अवैध दारू विक्री करणाऱ्या कुटुंबाची नळ जोडणी तात्काळ तोडली असल्याचे उपोषणकर्त्यांना सांगितले.
संबंधित दारू विक्रेत्याने यानंतर पुन्हा दारू विक्री केल्यास त्याचं रेशनही बंद करण्याचा इशारा ग्रामपंचायतच्यावतीने देण्यात आला आहे. याशिवाय विक्रेत्याने दारू विक्री स्वतःहून बंद केल्यास त्याचं शासकीय जागेतील अतिक्रमण देखील जमीन दोस्त करण्याचा निर्णय येथील ग्रामस्थांनी घेतला आहे.
संबंधितांनी दारू विक्री बंद न केल्यास ग्रामपंचायत च्या वतीने त्यांच्या सर्व सुविधा बंद केल्या जाणार असल्याचे माहिती उपसरपंच नामदेव घुले यांनी दिली.
